अविनाश पवार, प्रतिनिधी
Pandharpur Wari Palkhi 2025 : पंढरपूरच्या दिशेने मार्गस्थ झालेली संत ज्ञानेश्वर महाराजांची पालखी ही महाराष्ट्राच्या संतपरंपरेचा आणि भक्तीसंस्कृतीचा भव्य अविष्कार आहे. ‘ज्ञानोबा-तुकाराम'चा गजर करत हजारो वारकरी पंढरपूरच्या विठ्ठलदर्शनासाठी चालत निघाले आहेत. ही केवळ एक धार्मिक यात्रा नाही, तर ती सामाजिक समतेचा, बंधुभावाचा आणि परस्पर सहकार्याचा आदर्श उदाहरण आहे.
माऊलींची पालखी (Dnyaneshwar Maharaj Palkhi ) 19 जून रोजी आळंदीहून पंढरपुरासाठी रवाना झाली आहे. दरम्यान पुण्यातील दोन दिवसांच्या मुक्कामानंतर आज या पालखीने जेजुरीहून प्रस्थान केलं आहे. माऊलींच्या पालखीचा आजचा मुक्काम वाल्हे येथे असणार आहे. यानंतर लोणंद, तरडगाव, फलटण, बरड, नातेपुते, माळशिरस, वेळापूर, भंडीशेगाव, वाखरी आणि 5 जुलै रोजी पंढरपुरात (pandharpur palkhi schedule 2025) पोहोचेल.
वारीत सहभागी होणारे सर्वजण, मग ते शहरातील असोत वा ग्रामीण भागातील, धनिक असोत वा गरिब, पुरुष असोत वा महिला – सारेजण ‘हरिपाठ', ‘अभंग' आणि ‘जय जय राम कृष्ण हरी' च्या घोषात हरवलेले असतात. यामध्ये लिंग, जात, वय याचा कुठेही अडसर नसतो. सर्व वारकरी एकसमान पांढऱ्या वस्त्रात, डोक्यावर फेटा बांधून, हातात टाळ किंवा मृदुंग घेत, टाळ-मृदंगाच्या गजरात पुढे पुढे चालत असतात.
ज्ञानेश्वर महाराज (Dnyaneshwar Maharaj Palkhi ) पालखी सोहळ्याचे नियोजनही अत्यंत शिस्तबद्ध आणि कल्पकतेने केलेले असते. पालखीसमवेत मोठा लवाजमा असतो. विविध ट्रकमधून खाण्यापिण्याचे साहित्य, भांडी, मंडप साहित्य, औषधे आणि वैद्यकीय टीम, पाण्याच्या टाक्या इत्यादी सर्व सुविधा पुढच्या मुक्कामाच्या ठिकाणी पोहोचवल्या जातात. मुक्कामी पोहोचल्यावर महिलांसाठी स्वयंपाक केंद्र, वारकऱ्यांसाठी निवास व्यवस्था, तसेच स्वच्छतागृहांची सोय केली जाते. अनेक सामाजिक संस्था, स्वयंसेवी मंडळे, आणि स्थानिक नागरिक यामध्ये मोठ्या प्रमाणावर सहभाग घेतात.
नक्की वाचा - Pune Palkhi 2025 : संत ज्ञानेश्वर महाराजांच्या पालखी सोहळ्याची तयारी पूर्ण; कसा असेल पालखीमार्ग, पाहा वेळापत्रक
वारीच्या मार्गावर पोलीस, आरोग्य कर्मचारी, स्वयंसेवक यांचा सजग सहभाग असतो. आपत्ती व्यवस्थापनासाठी विविध उपाययोजना राबवल्या जातात. रस्त्यावरील वाहतूक नियोजन, वैद्यकीय मदत केंद्रे, मोबाईल हॉस्पिटल्स, पिण्याच्या पाण्याचे टँकर या सर्व गोष्टींचीही काळजी घेतली जाते.
वारी हे केवळ चालण्याचे माध्यम नाही, तर ती अंतर्मुख होण्याची, साधनेसाठी स्वतःला झोकून देण्याची एक प्रक्रिया आहे. या प्रवासात वारकरी आपल्या शरीराच्या आणि मनाच्या क्षमतांचा कस घेतो. दिवसाचे 15-20 किलोमीटर चालणे, भजन-कीर्तनात सहभाग, अल्प व साधे अन्न आणि उघड्यावर झोपण्याची तयारी – या सर्व गोष्टी सहजतेने स्वीकारल्या जातात.
ही पालखी केवळ पुणे, सासवड, जेजुरी, लोणी, तळेगाव, बारामती मार्गेच जात नाही, तर ती हजारो भाविकांच्या अंत:करणातूनही मार्गक्रमण करत असते. ज्या गावांमधून ही पालखी जाते, तेथील लोक मार्गावर रांगोळ्या काढून, फुलांची उधळण करून, अन्नदाने करून या संतप्रवाशांचे स्वागत करतात.
संत ज्ञानेश्वरांची वारी हे महाराष्ट्राच्या सांस्कृतिक वारशाचे प्रतीक आहे. श्रद्धा, भक्ती, समता, आणि समाजबंध ही या वारीची खरी ओळख आहे. ही परंपरा शेकडो वर्षांपासून अखंड चालत आलेली असून, आजही ती तितक्याच निष्ठेने, तितक्याच उत्साहाने आणि शिस्तबद्धतेने पाळली जाते. पंढरपूरची ही वारी म्हणजे आत्मिक उन्नतीचा आणि समाजसुधारणेचा एक समर्पित प्रवास आहे
Track Latest News Live on Marathi.NDTV.com and get news updates from India and around the world
