न्यू इंडिया को-ऑपरेटिव्ह बँक अडचणीत सापडल्यानंतर बँकेत झालेले अनेक घोटाळे आता समोर येत आहे. बॉलीवूड अभिनेत्री प्रीती झिंटा हिचं नाव देखील यात समोर आलं आहे. प्रिती झिंटा हिच्या नावावर असलेले 18 कोटी रुपयांचे कर्ज न्यू इंडिया को-ऑपरेटिव्ह बँकने माफ केले होते. मात्र हा दावा प्रिती झिंटाने फेटाळून लावला आहे.
('NDTV मराठी' चं अधिकृत व्हॉट्सअ‍ॅप चॅनल जॉईन करा )
प्रिती झिंटाने या आरोपांवर प्रतिक्रिया देताना म्हटलं की, "12 वर्षांपूर्वी, न्यू इंडिया को-ऑपरेटिव्ह बँकेत माझी ओव्हरड्राफ्ट सुविधा होती. 10 वर्षांपूर्वी, मी या ओव्हरड्राफ्ट सुविधेचे संपूर्ण देय पूर्ण परत केले आणि खाते बंद झाले आहे."
काय आहे आरोप?
न्यू इंडिया बँकेच्या कर्मचाऱ्यांनी एकत्र येत 2020 मध्ये रिझर्व्ह बँकेला त्या बँकेत सुरु असलेल्या घोटाळ्याबद्दल सहीनिशी पत्रव्यवहार केला होता. अभिनेत्री प्रिती झिंटाला बँकेने 18 कोटी रुपयांचे कर्ज दिले होते. प्रिती झिंटा हिने ते कर्ज फेडले नाही, त्यामुळे थकबाकी वाढली होती. बँकेने हे कर्ज वसूल करण्यासाठी कोणतेही प्रयत्न केले नाही. बँकेच्या नियमांचं कोणतेही पालन न करता ते कर्ज राइट ऑफ केले आणि ते बँकेच्या तोट्यात वर्ग केले. सूत्रांच्या माहितीनुसार प्रिती झिंटाने हे कर्ज कॅरेबियन देशांत टी-20 क्रिकेट स्पर्धेतील संघासाठी बोली लावण्यासाठी घेतले होते.
(नक्की वाचा- Nashik News: कृषिमंत्री कोकाटेंना तात्पुरता दिलासा! 2 वर्षांच्या शिक्षेला स्थगिती; कोर्टाने काय म्हटलं?)
माजी अध्यक्षांचा कोट्यवधींचा अपहार
बँकेचे तत्कालीन अध्यक्ष हिरेन भानू यांच्या कार्यकाळात झालेल्या आर्थिक अनियमितता, गैरव्यवस्थापन आणि भ्रष्टाचाराची सविस्तर माहिती बँकेच्या कर्मचाऱ्यांना रिझर्व्ह बँकेला दिलेल्या पत्रात दिली होती. रिपोर्ट्सनुसार 2010 पूर्वी बँकेने लहान कर्जे आणि प्राधान्य क्षेत्रांवर लक्ष केंद्रित केले. पण हिरेन भानू यांच्या आगमनानंतर, शाखा व्यवस्थापकांना माहिती नसताना 25 कोटी रुपयांपर्यंतचे कॉर्पोरेट कर्ज मंजूर होऊ लागले.
(नक्की वाचा- Exclusive : 18 कोटींचं कर्ज माफ केलं 'ती' बॉलिवूड अभिनेत्री कोण? 'न्यू इंडिया' बँकेचा आणखी एक प्रताप)
यातील बरीच मोठी कर्जे एका वर्षाच्या आत एनपीए झाली आणि निधी इतर बँकांमधून वळवण्यात आला. अशाप्रकारे बँकेचे माजी अध्यक्ष हिरेन भानू आणि त्यांच्या पत्नी यांनी कोट्यवधींचा अपहार केला. रिझर्व्ह बँकेने याकडे दुर्लक्ष केल्याचा मोठा फटका आता सामन्य खातेधारकांना बसत आहे.
