'SIR' विरोधावरून भाजप प्रदेशाध्यक्ष रविंद्र चव्हाण आक्रमक! ठाकरे बंधूंच्या 'गर्जना मोर्चा'वर पलटवार

विशेष ओळख नोंदणी (SIR) प्रक्रियेवरून महाराष्ट्र राजकारणात तापलेल्या वातावरणादरम्यान भाजप प्रदेशाध्यक्ष रविंद्र चव्हाण* यांनी ठाकरे बंधूंच्या 'गर्जना मोर्चा'वर जोरदार पलटवार केला आहे.

जाहिरात
Read Time: 2 mins

विशेष ओळख नोंदणी (SIR) प्रक्रियेला विरोध करत ठाकरे बंधूंनी पुकारलेल्या 'गर्जना मोर्चा'ला उत्तर देण्यासाठी भारतीय जनता पक्षाने आक्रमक पवित्रा घेतला आहे. भाजपचे महाराष्ट्र प्रदेशाध्यक्ष रविंद्र चव्हाण यांनी सोशल मीडिया पोस्टद्वारे केंद्रीय गृहमंत्री अमित शाह यांच्या संसदेतील वक्तव्याचा आधार घेत विरोधकांवर जोरदार हल्लाबोल केला. SIR प्रक्रियेला विरोध करणाऱ्या राजकीय नेत्यांनी आणि पक्षांनी आधी मूलभूत प्रश्नांची उत्तरे द्यावीत, मगच रस्त्यावर उतरावे, असे आव्हान चव्हाण यांनी दिले आहे.

रविंद्र चव्हाण यांनी विरोधकांना विचारलेले 3 रोखठोक सवाल

केंद्रीय गृहमंत्री अमित शाह यांनी संसदेत मांडलेल्या भूमिकेचा दाखला देत रविंद्र चव्हाण यांनी ठाकरे बंधू आणि विरोधी पक्षांना पुढील तीन थेट प्रश्न विचारले आहेत.

Advertisement
  1. देशाचे भविष्य घुसखोरांनी ठरवायचे का?: "देशाचे पंतप्रधान आणि राज्याचे मुख्यमंत्री कोण असावे, हे घुसखोरांनी ठरवायचे का? तसे झाले तर देशातील लोकशाही सुरक्षित राहील का?"
  2. दुबार मतदानाला संमती आहे का?: "एकाच मतदाराला एकापेक्षा अधिक ठिकाणी मतदान करण्याची मुभा असावी का?"
  3. बोगस मतदारांना संरक्षण का?: "मृत्यू पावलेल्या नागरिकांना मतदार यादीत स्थान असावे का?"

रविंद्र चव्हाण यांच्या मते, SIR प्रक्रिया ही पारदर्शक लोकशाहीसाठी आणि बोगस मतदारांना हद्दपार करण्यासाठी अत्यंत आवश्यक आहे.

'गर्जना मोर्चा' विरुद्ध भाजपचा आक्रमक पवित्रा

ठाकरे बंधूंनी 'गर्जना मोर्चा'च्या माध्यमातून SIR प्रक्रियेमुळे नागरिकांची अडचण होत असल्याचे सांगत राज्यभर आंदोलनाचा इशारा दिला होता. मात्र, भाजपने याला "व्होट बँक आणि राजकीय स्वार्थाचे राजकारण" असे संबोधले आहे.

"SIR प्रक्रियेला विरोध करणारे हेच लोक बोगस आणि दुबार मतदारांच्या जीवावर राजकारण करत आहेत. देशाच्या सुरक्षेशी आणि लोकशाहीशी तडजोड खपवून घेतली जाणार नाही" असं रविंद्र चव्हाण यांनी म्हटलं आहे. 


Topics mentioned in this article

Track Latest News Live on Marathi.NDTV.com and get news updates from India and around the world