TCS Conversion Case: टाटा कन्सल्टन्सी सर्व्हिसेस (TCS) मधील महिला कर्मचाऱ्यांचे कथित लैंगिक शोषण आणि बळजबरीने धर्मांतर करण्याच्या प्रयत्नासारख्या गंभीर गुन्ह्यातील संशयित आरोपी निदा खान हिला अखेर जामीन मंजूर झाला आहे. नाशिकच्या विशेष न्यायालयाने हा अत्यंत महत्त्वपूर्ण निर्णय दिला असून, दोन महिन्यांहून अधिक काळ तुरुंगात असलेल्या निदा खानला मोठा दिलासा मिळाला आहे. हा जामीन देताना विशेष न्यायालयाने थेट भगवान श्रीकृष्णाच्या जन्माचा दाखला देत एक अत्यंत संवेदनशील आणि ऐतिहासिक टिप्पणी केली आहे. त्याची सर्वत्र चर्चा सुरु आहे.
कोर्टानं काय सांगितलं?
संशयित आरोपी निदा खान सध्या 5 महिन्यांची गरोदर आहे. हिच बाब लक्षात घेऊन विशेष न्यायालयाचे न्यायाधीश के. जी. जोशी यांनी तिला जामीन मंजूर केला. निकाल देताना न्यायाधीश म्हणाले की, यामध्ये कोणताही वाद नाही की याचिकाकर्ती निदा ही 5 महिन्यांची गरोदर आहे. भगवान श्रीकृष्णाप्रमाणे जेलमध्ये बाळाला जन्म देण्याची वेदना, मानसिक आघात किंवा त्याशी जोडलेला सामाजिक कलंक हा कोणत्याही महिलेसाठी किंवा नवजात बाळासाठी सहने योग्य नसतो.
अशा अत्यंत दुखद आणि कठीण परिस्थितीपासून वाचण्यासाठी, तसेच होणाऱ्या नवजात शिशूच्या हिताचा विचार करून आरोपीच्या बाजूने न्यायालयीन विवेकाधिकाराचा वापर करणे पूर्णपणे योग्य ठरेल.
( नक्की वाचा : मॅडमने डावललं, कोणीच ऐकलं नाही! हतबल झालेल्या 9 वर्षांच्या मुलीचा शेवटचा प्रवास CCTV मध्ये कैद, पाहा VIDEO )
काय आहेत निदा खानवरील गंभीर आरोप?
निदा खान हिला दोन महिन्यांपूर्वी नाशिकमधील टीसीएसच्या एका आउटसोर्सिंग युनिटमधून अटक करण्यात आली होती. तिच्यावर कंपनीतील महिला सहकाऱ्यांचे लैंगिक शोषण करणे आणि त्यांना इस्लाम धर्म स्वीकारण्यासाठी मानसिक दबाव आणल्याचा गंभीर आरोप आहे. तपासादरम्यान समोर आलेल्या माहितीनुसार, निदाने तिच्या एका महिला सहकाऱ्याला बुर्का आणि इस्लामिक धार्मिक पुस्तके दिली होती.
इतकेच नाही, तर पीडितेच्या मोबाईलमध्ये इस्लामशी संबंधित ॲप्स डाऊनलोड करून, तिच्या घरी जाऊन नमाज पठण करण्याचे तंत्रही शिकवले होते. हिंदू धर्माबद्दल आक्षेपार्ह गोष्टी सांगून पीडितेचे ब्रेनवॉश करण्याचा प्रयत्न निदा आणि तिच्या इतर सहकाऱ्यांनी केला होता, असे प्रथमदर्शनी तपासात समोर आले आहे.
( नक्की वाचा : Nashik News: नाशिक वाचलं! महाभयंकर ढगफुटीचे संकट घोंघावत असताना 'या' एका स्वदेशी AI नं कसा घडवला चमत्कार? )
वकिलांचा युक्तिवाद आणि कोर्टाचा निर्णय
न्यायालयात सुनावणी दरम्यान पीडितेच्या वकिलांनी या जामिनाला तीव्र विरोध केला. निदा खान विरुद्ध लैंगिक शोषण आणि धार्मिक सक्तीचे पुरेसे पुरावे गोळा झाले असल्याचे त्यांनी कोर्टाला सांगितले. दुसरीकडे, निदा खानच्या वकिलांनी हे सर्व आरोप फेटाळून लावत तिला खोट्या प्रकरणात अडकवण्यात आल्याचा दावा केला.
निदा ही उच्चशिक्षित प्रोफेशनल असून एप्रिल 2026 मध्ये नोकरीवरून काढण्यापूर्वी ती टीसीएसमध्ये असोसिएट म्हणून काम करत होती, अशी बाजू त्यांनी मांडली. या प्रकरणात देवलाली कॅम्प पोलीस ठाण्यात आधीच चार्जशीट दाखल झाली असून तपास पूर्ण झाला आहे, त्यामुळे आता निदाला तुरुंगात ठेवण्याची गरज नाही, असे न्यायालयाने स्पष्ट केले.
विशेष न्यायालयाने दोन्ही बाजूंचा युक्तिवाद ऐकल्यानंतर आणि मुख्यत्वे निदा खानच्या गरोदरपणाचा व होणाऱ्या बाळाच्या भविष्याचा विचार करून तिला अटींसह जामीन मंजूर केला आहे. कोर्टाने निदा खान हिला 75000 रुपयांच्या पर्सनल बॉन्ड आणि तेवढ्याच रकमेच्या एका सॉल्व्हेंट जामिनावर मुक्त करण्याचे आदेश दिले आहेत. या प्रकरणातील इतर 7 आरोपींवर 26 मार्च ते 3 अप्रैल दरम्यान दाखल झालेल्या एकूण 9 एफआयआरअंतर्गत तपास सुरू आहे, मात्र गरोदरपणामुळे निदा खानला नाशिक कोर्टाकडून हा मोठा दिलासा मिळाला आहे.
