Nagpur News : नागपूरच्या वैद्यकीय क्षेत्राला हादरवणारी बातमी समोर आली आहे. नागपुरातील प्रसिद्ध रुग्णालयातील एका निवासी महिला डॉक्टरचा छळ आणि छेडछाड केल्याच्या तक्रारीवरून विभागप्रमुख डॉ. मकरंद सूर्यकांत व्यवहारे यांच्याविरुद्ध तहसील पोलिसांनी विनयभंगाचा गुन्हा दाखल केला आहे. नागपूर शहरातील इंदिरा गांधी वैद्यकीय महाविद्यालय आणि रुग्णालय अर्थात पूर्वाश्रमीच्या मेयो रुग्णालयात हा प्रकार घडल्याचे तक्रारीत नमूद करण्यात आले आहे. यामुळे वैद्यकीय क्षेत्रात खळबळ उडाली आहे.
न्यायवैद्यक विभागाचे विभागप्रमुख डॉ. मकरंद सूर्यकांत व्यवहारे यांच्या विरोधात पोलिसांत गुन्हा दाखल न झाल्यास राज्यव्यापी आंदोलन करण्याचा इशारा मार्ड या निवासी डॉक्टरांच्या संघटनेने दिला होता.
नक्की वाचा - Navi Mumbai : अल्पवयीन मुली टार्गेटवर? नवी मुंबईतून गायब होतायेत मुली, काल 4 तर आणखी दोघी बेपत्ता
निवासी महिला डॉक्टरचा विनयभंग
तहसील पोलिसांनी दिलेल्या माहितीनुसार, पीडित 27 वर्षीय महिला निवासी डॉक्टर इंदिरा गांधी शासकीय वैद्यकीय महाविद्यालय व रुग्णालयात (मेयो) न्यायवैद्यकशास्त्र विषयात पदव्युत्तर पदवीच्या प्रथम वर्षाला शिकत असून ती फेब्रुवारीपासून या विभागात कार्यरत आहे. तक्रारीनुसार, न्यायवैद्यक विभागाचे विभागप्रमुख डॉ. मकरंद व्यवहारे तिला सुरुवातीपासून त्रास देत होते. तिला एकटीला वारंवार आपल्या कक्षात बोलावून तिच्यासोबत आपत्तीजनक व्यवहार करीत होते. सुरुवातीला या महिला निवासी डॉक्टरने त्यांच्या वागण्याकडे दुर्लक्ष केले; परंतु नंतर तिने या बाबींना विरोध केला असता तिला डॉ. व्यवहारे यांनी धमकी दिली. महिला डॉक्टरने याबाबत रुग्णालयातील वरिष्ठांकडे तक्रार करूनही त्यांनी तक्रारीची दखल घेतली नाही. अखेर महिला निवासी डॉक्टरने तहसील पोलीस ठाण्यात तक्रार दाखल केली. या घटनेमुळे निवासी डॉक्टरांमध्ये विभाग प्रमुख आणि महाविद्यालय प्रशासन यांच्या विरोधात रोष व्यक्‍त करण्यात येत होता.
Track Latest News Live on Marathi.NDTV.com and get news updates from India and around the world
