आधार कार्डवरील त्या चुकीमुळे तरुणी डिप्रेशनमध्ये, कॉलेजने प्रवेश नाकारल्याने थेट सुसाइडचं पाऊल; जबाबदार कोण?

Rajasthan News: आधार कार्डवरील नावातील चुकीमुळे एका विद्यार्थिनीने विष पिऊन आत्महत्या करण्याचा प्रयत्न केला आहे. राजस्थानच्या बांसवाडा जिल्ह्यातील ही धक्कादायक घटना आहे. दानपूर पोलीस ठाण्याच्या हद्दीतील सालरा पाडा गावातील रहिवासी असलेल्या विद्यार्थिनी पूजाला (कागदपत्रामध्ये वेगवेगळे नाव) कॉलेजमध्ये प्रवेश मिळवण्यात अडचणी येत होत्या. तिच्या दोन महत्त्वाच्या कागदपत्रांमध्ये नावाचे स्पेलिंग किंवा नाव वेगळे असल्याने ही समस्या निर्माण झाली होती. तिच्या मार्कशीटवर योग्य नाव होते, पण आधार कार्डमध्ये नाव चुकीचे असल्याने तिला कॉलेजमध्ये प्रवेश नाकारण्यात आला. ही चूक दुरुस्त करण्यासाठी अनेकदा प्रयत्न केले, पण त्यात यश न आल्याने तिने आत्महत्या करण्याचे टोकाचे पाऊल उचलले.

मार्कशीटवर नाव 'पूजा', पण आधार कार्डवर नाव 'उषा'

कुटुंबीयांच्या म्हणण्यानुसार, तिच्या आधार कार्डवर 'उषा' असे नाव आहे, तर इतर शैक्षणिक कागदपत्रांवर 'पूजा' या नावाची नोंद आहे. दोन्ही कागदपत्रांवर वेगवेगळी नावे असल्याने कॉलेज प्रशासनाने प्रवेश देण्यास नकार दिला.

(नक्की वाचा: Mahabaleshwar News: प्रतापगड परिसरात एका वळणामुळे सुखी संसार उद्ध्वस्त, 8 तासांनंतर 900 फूट खोल दरीत भयंकर अवस्थेत सापडली पत्नी)

ई-मित्र केंद्रात मारल्या कित्येक फेऱ्या 

विद्यार्थिनी गेल्या अनेक दिवसांपासून ही चूक दुरुस्त करण्यासाठी ई-मित्र केंद्रांच्या चकरा मारत होती, पण प्रत्येक वेळी तिला निराशाच पदरी पडली. सततच्या धावपळीमुळे आणि अभ्यासाचे नुकसान होत असल्याच्या चिंतेमुळे ती मानसिक तणावाखाली होती. याच तणावातून तिने विषारी औषध सेवन केल्याची माहिती कुटुंबीयांनी दिली आहे.

Photo Credit: NDTV Marathi

ही घटना घडताच कुटुंबात एकच खळबळ उडाली. तातडीने तिला रुग्णवाहिकेद्वारे हॉस्पिटलमध्ये नेण्यात आले. प्राथमिक उपचारानंतर तिची प्रकृती गंभीर असल्याने तिला बांसवाडा येथील एमजी रुग्णालयात हलवण्यात आले असून सध्या तिच्यावर उपचार सुरू आहेत.