दौंडमध्ये अनैतिक संबंधातून जावयाने सासऱ्याला संपवलं; सासू ठरली कारण!

देवा राखुंडे, प्रतिनिधी

दौंडमध्ये जावयाने चाकूने भोसकून सासऱ्याची हत्या केल्याचा धक्कादायक प्रकार समोर आला आहे. आठवडाभरात हत्येची ही दुसरी घटना घडल्याने दौंड तालुका हादरला आहे. सासऱ्याने जावयावर अनैतिक संबंधाचा आरोप केला होता आणि या प्रकरणात जाब विचारल्यामुळे संतापलेल्या जावयाने सासऱ्याचा जीव घेतला. धक्कादायक बाब म्हणजे सासऱ्यांनी स्वत:च्या पत्नीने म्हणजे तरुणाचे सासूसोबत अनैतिक संबंध असल्याचा आरोप केला आहे. 

चिडलेल्या जावयाने थेट सासऱ्याच्या छातीत चाकू भोसकून त्यांचा खून केल्याची घटना दौंड तालुक्यातील बोरीबेलमध्ये घडली आहे. सुदाम हिऱ्या चव्हाण असं खून झालेल्या सासऱ्याचं नाव आहे. तर लकझऱ्या कोब्या काळे याच्यावर दौंड पोलिसांनी सासऱ्याच्या खूना प्रकरणी गुन्हा दाखल केला आहे. 3 ऑगस्ट रोजी दौंड तालुक्यातील खामगांवमध्ये सूरज राहुल भुजबळ या तरुणाचा धारधार कोयत्याने वार करीत खून झाला होता. ही घटना ताजी असतानाचं दौंडमध्ये आता आणखी एक खूनाची घटना घडल्याने मोठी खळबळ उडाली आहे.

नक्की वाचा - गर्लफ्रेंडला आयफोन गिफ्ट देण्यासाठी नववीतील मुलाने आईला दिला धोका; घरी गेला, कपाट उघडलं अन्...

आपल्या पत्नीशी जावयाचे अनैतिक संबंध असल्याचा सुदाम यांना संशय होता. त्यांचे जावाई लकझऱ्या कोब्या काळे हे आपल्या सासरवाडीत बोरीबेल येथे आले होते. यावेळी जावई आणि सासरे सुदाम चव्हाण यांच्यात वाद झाला. संतापलेल्या जावयाने थेट सासऱ्याला चाकूने भोसकलं. सुदाम चव्हाण बेशुध्द पडल्याने नातेवाईकांनी जखमी झालेल्या चव्हाण यांना तत्काळ दौंड उपजिल्हा रुग्णालयात उपचारासाठी दाखल केले. मात्र उपचारादरम्यान त्यांचा मृत्यू झाल्याचं डाॅक्टरांनी सांगितलं. आरोपी लकझऱ्या फरार असून पोलीस त्याचा शोध घेत आहेत.