एका बाईच्या मागे दुसरी बाई खंबीरपणे का नाही उभी राहू शकत?; अगं अगं सूनबाई! काय म्हणताय सासूबाई?चा टीझर रिलीज

Aga Aga Sunbai Kay Mhantay Sasubai Teaser: 'अगं अगं सूनबाई! काय म्हणताय सासूबाई?' सिनेमा लवकरच प्रेक्षकांच्या भेटीला येणार आहे. काही दिवसांपूर्वी प्रदर्शित झालेल्या पोस्टरने या सिनेमाबाबत प्रचंड उत्सुकता निर्माण केली होती. पाठमोऱ्या दिसणाऱ्या सासू-सुनेच्या जोडीने प्रेक्षकांच्या मनात एकच प्रश्न निर्माण केला होता की ही जोडी नेमकी कोणाची? आणि आता या प्रश्नाचं उत्तर देत, मनोरंजनाची पूर्ण तयारी करत सिनेमाचा धमाल टीझर प्रदर्शित झालाय. सिनेमाच्या टीमने मुंबईतील महालक्ष्मीच्या मंदिरात जाऊन देवीचे आशीर्वाद घेत सिनेमाचे टीझर आणि पोस्टरचे अनावरण केले. 

सासू-सूनेच्या जोडीमध्ये कोण दिसणार?

या सिनेमाच्या निमित्ताने प्रार्थना बेहरे आणि निर्मिती सावंत पहिल्यांदाच एकत्र पडद्यावर झळकणार आहेत. सासू-सूनेची एक हटके, ताकदवान आणि तितकीच खमंग जोडी प्रेक्षकांना पाहायला मिळणार आहे. टीझरमध्येच दोघींची जुगलबंदी, टोमणे, मिश्किल संवाद आणि भावनिक क्षण यांचा सुरेख मेळ पाहायला मिळतोय. प्रार्थना बेहरे आधुनिक, आत्मविश्वासू आणि स्पष्टवक्ती सून म्हणून दिसत आहे तर निर्मिती सावंत पारंपरिक, ठाम मतांच्या आणि अनुभवसंपन्न सासूबाईंच्या भूमिकेत लक्ष वेधून घेत आहेत.

(नक्की वाचा: Dhurandhar Box Office Collection: धुरंधरची बॉक्सऑफिसवर छप्परफाड कमाई, 'पुष्पा 2'लाही टाकलं मागे, पुणेकरांसाठी गुड न्यूज)

दोन महिला एकत्र आल्या तर काय होतं?

दोन पिढ्या, दोन विचारधारा आणि दोन कणखर महिलांमधील नात्याचं गोड–तिखट, हलकंफुलकं तरीही अर्थपूर्ण चित्रण या चित्रपटाचं प्रमुख वैशिष्ट्य ठरणार आहे. समाजात नेहमी म्हटलं जातं की, ''प्रत्येक पुरुषाच्या मागे एक स्त्री असते'', परंतु एका स्त्रीच्या मागे दुसरी स्त्री ठामपणे उभी राहिली तर, ती नाती किती बळकट होऊ शकतात, हाच विचार हा चित्रपट अतिशय सहज आणि प्रभावीपणे मांडतो".

दिग्दर्शक केदार शिंदे म्हणतात,"ही कथा आजच्या काळातील सासू–सुनेच्या नात्याची आहे. दोघीही स्वतंत्र विचारांच्या आहेत, स्वतःच्या मतांवर ठाम आहेत. त्यामुळे मतभेद होतात, नोकझोक होते, परंतु त्याचबरोबर दोघींच्या समजूतदारपणाची आणि त्यांच्या तरल नात्याची सुंदर कहाणी यात आहे. सासू आणि सून एकमेकींच्या आयुष्यात आधार बनू शकतात, ही भावना या चित्रपटाचा गाभा आहे."

(नक्की वाचा: Dharmendra: ईशा देओलने धर्मेंद्र यांचा खास व्हिडीओ केला शेअर; प्रकाश कौर, सनी-बॉबीसह 2 बहिणींचीही दिसली झलक)

सिनेमा हसवेलही आणि विचारही करायला लावेल

झी स्टुडिओजचे व्यवसाय प्रमुख बवेश जानवलेकर म्हणतात, ''प्रेक्षकांना केवळ मनोरंजन नव्हे, तर विचार करायला लावणारा आशय देण्यावर आमचा भर असतो. ‘अगं अगं सूनबाई! काय म्हणताय सासूबाई?' हा चित्रपट हसवेलही आणि नात्यांकडे पाहण्याचा एक वेगळा दृष्टिकोनही देईल.”

झी स्टुडिओजचे उमेश कुमार बन्सल म्हणतात, ''आज स्त्रियांचं नातं केवळ संघर्षाचं नाही, तर एकमेकांना आधार देणारंही आहे. एका स्त्रीच्या पाठीशी दुसरी स्त्री उभी राहिल्यास काय बदल घडू शकतो, हे आम्ही या कथेतून दाखवण्याचा प्रामाणिक प्रयत्न केला आहे.”

View this post on Instagram

A post shared by ZeeStudios (@zeestudiosmarathi)

कधी हसवणारी तर कधी मनाला भिडणारी आणि आजच्या काळातील सासूसूनेच्या नात्यातील बंध उलगडणारी ही कथा, दोन पिढ्यातील स्त्रियांच्या नातेसंबंधाचं सामर्थ्य अधोरेखित करते. टीझर पाहून एक गोष्ट मात्र नक्की, ‘अगं अगं सूनबाई! काय म्हणताय सासूबाई?' हा चित्रपट सासू–सुनेच्या नात्याची एक नवी, ताजीतवानी आणि विचारप्रवर्तक ओळख देणारा आहे. 16 जानेवारी रोजी सिनेमा प्रेक्षकांच्या भेटीला येणार आहे.