Bollywood News: काही लोक सिनेमांमध्ये फक्त अभिनय करायला येत नाहीत, तर ते आपल्या पाठीमागे एक मोठा वारसा सोडून जातात. ही कहाणी देखील अशाच एका कलाकाराची आहे, ज्यांचे आयुष्य एखाद्या सिनेमापेक्षा कमी नव्हते. वडील डॉक्टर होते आणि आई नर्स, त्यामुळे सर्वांना असे वाटले की मुलगाही शिकून कुठेतरी मोठी नोकरी करेल. तो अभ्यासात हुशार होता, पुस्तकांचं त्याला वेड होतं आणि कविता लिहिणे त्याला सर्वात जास्त आवडायचे. मग आयुष्याने असे काही वळण घेतले की, कवी बनण्याचे स्वप्न पाहणाऱ्या या मुलाने थिएटर आणि सिनेमाच्या जगात वेगळे स्थान निर्माण केले. पुढे तीच व्यक्ती सलमान खानच्या 'टायगर' फ्रँचायझीमध्ये त्याच्या बॉसच्या भूमिकेत दिसली आणि आताच्या पिढीलाही अभिनयाने वेड लावले. ही कहाणी आहे अभिनेते गिरीश कर्नाड यांची, ज्यांचा जन्म 19 मे 1938 रोजी झाला होता.
इंग्लंडमध्ये पोहोचल्यावर विचार बदलला
गिरीश कर्नाड यांचा जन्म महाराष्ट्रात झाला होता. बालपणापासूनच ते अभ्यासात खूप चांगले होते. कुटुंबीयांचीही शैक्षणिक पार्श्वभूमी चांगली होती, त्यामुळे गिरीश यांच्या मनामध्येही पुस्तकांची गोडी निर्माण झाली होती. पुढील शिक्षणासाठी त्यांना रोड्स स्कॉलरशिप मिळाली आणि ते इंग्लंडच्या ऑक्सफर्ड युनिव्हर्सिटीत पोहोचले. तिथे त्यांनी फिलॉसॉफी, पॉलिटिक्स आणि इकॉनॉमिक्स या विषयाचे शिक्षण घेतले. पण खरा आनंद त्यांना लायब्ररीमध्ये तास-न्-तास बसून कविता आणि गोष्टी वाचण्यात मिळायचा.
कवी बनायला निघाले होते, बनले स्टार
ऑक्सफोर्डमध्ये असताना मोठे कवी होण्याचे स्वप्न गिरीश कर्नाड यांनी पाहिले होते. पण तिथेच त्यांना जाणीव झाली की भारतीय कथांमध्ये इतकी ताकद आहे की त्या संपूर्ण जगापर्यंत पोहोचवल्या जाऊ शकतात. बस... इथूनच त्यांचे आयुष्य बदलले. त्यांनी नाटके लिहिण्यास सुरुवात केली आणि वर्ष 1961 मध्ये त्यांनी लिहिलेले त्यांचे पहिले नाटक 'ययाति' प्रचंड चर्चेत आले. यानंतर 'तुघलक', 'हयवदन' आणि 'नागमंडल' यासारख्या नाटकांमुळे त्यांना थिएटरच्या दुनियेत प्रचंड लोकप्रियता मिळाली.
(नक्की वाचा: 71 वर्षांचा अभिनेता, 68 वर्षीय धाकट्या भावाचे उचलतोय सर्व खर्च, म्हणाले-माझ्या पत्नीनंही कधी काही विचारलं नाही)
थिएटरपासून सिनेमापर्यंत गिरीश गाजलेलेखनानंतर गिरीश कर्नाड यांनी अभिनयाच्या दुनियेत पाऊल ठेवले आणि इथेही त्यांनी लोकांना खूप प्रभावित केले. 'मंथन', 'निशांत', 'डोर', 'इक्बाल' आणि 'मालगुडी डेज' यासारख्या प्रोजेक्ट्समधील त्यांचे काम आजही प्रेक्षकांच्या लक्षात आहे. स्क्रीनवरील त्यांचा शांत अंदाज आणि दमदार संवादफेक (डायलॉग डिलिव्हरी) लोकांना एक वेगळाच अनुभव द्यायची.
नव्या पिढीसाठी गिरीश कर्नाड यांच्या सर्वात लक्षात राहणाऱ्या सिनेमांमध्ये 'एक था टायगर' आणि 'टायगर जिंदा है' यांचा समावेश आहे. या सिनेमांमध्ये त्यांनी 'रॉ चीफ' (RAW Chief) ची भूमिका साकारली होती. सलमान खानचे बॉस म्हणून त्यांची भूमिका अतिशय शक्तिशाली दाखवण्यात आली होती. कमी स्क्रीन टाइममध्येही ते प्रत्येक सीनमध्ये आपली एक वेगळी छाप सोडून जायचे. 10 जून 2019 रोजी गिरीश कर्नाड यांनी या जगाचा निरोप घेतला, पण त्यांचे सिनेमे, नाटके आणि भूमिका आजही लोकांच्या मनात जिवंत आहेत.
Track Latest News Live on Marathi.NDTV.com and get news updates from India and around the world
