घरगुती गॅस सिलिंडरची तुटपुंजी सबसिडी जमा झाली आहे की नाही, हे पाहण्यासाठी पंजाब नॅशनल बँकेच्या (PNB) शाखेत गेलेल्या एका 36 वर्षीय महिलेला असा काही धक्का बसला ज्याची तिने स्वप्नातही कल्पना केली नव्हती. पश्चिम बंगालच्या दक्षिण 24 परगणा जिल्ह्यात राहणाऱ्या कश्मीरा शेख यांच्या बँक खात्यात तब्बल 99,99,99,997 म्हणजेच सुमारे 100 कोटी रुपये जमा झाल्याचे बँकेतील कर्मचाऱ्यांनी सांगितले. पत्र्याच्या छताखाली राहणाऱ्या आणि झरीकाम करून आपला उदरनिर्वाह चालवणाऱ्या कश्मीरा शेख यांना ही बातमी ऐकून मोठा धक्का बसला आहे.
बँक खाते सील अन् चौकशी सुरू
अचानक बँक खात्यात अब्जावधी रुपये जमा झाल्याची माहिती मिळताच पंजाब नॅशनल बँकेच्या प्रशासनात खळबळ उडाली. या प्रकरणाची सखोल चौकशी सुरू होईपर्यंत बँकेने कश्मीरा शेख यांचे एकमेव बँक खाते तात्काळ गोठवले आहे.
(नक्की वाचा- Ajinkya Rahane: क्रिकेटमधून निवृत्तीनंतरही रहाणेला BCCI कडून मिळणार दरमाह एवढी रक्कम)
बँकेच्या सूत्रांनी दिलेल्या प्राथमिक माहितीनुसार, हा सर्व प्रकार बँकेच्या सर्व्हरमधील तांत्रिक चुकीमुळे घडल्याचा अंदाज व्यक्त केला जात आहे. मात्र, पंजाब नॅशनल बँकेकडून अद्याप याबाबत कोणतेही अधिकृत वक्तव्य जारी करण्यात आलेले नाही.
(नक्की वाचा- पिंपरी-चिंचवडमध्ये 'आय फ्लू'चा उद्रेक! पावसाळ्यात डोळ्यांच्या संसर्गाचे रुग्ण वाढले; डॉक्टरांचा गंभीर इशारा)
इतर ग्राहकांसोबतही घडला असाच प्रकार
पश्चिम बंगालमध्ये अशा प्रकारची ही पहिलीच घटना नाही. कश्मीरा शेख यांच्या व्यतिरिक्त इतरही काही ग्राहकांना अशाच प्रकारच्या तांत्रिक गोंधळाला सामोरे जावे लागले आहे. कोलकात्यात 'क्लाऊड किचन' चालवणाऱ्या नुपूर गुप्ता नावाच्या महिलेच्या बँक खात्यात अचानक 47 कोटी रुपये जमा झाले होते. यानंतर बँक अधिकाऱ्यांनी त्यांची कसून चौकशी केली होती. सध्या पंजाब नॅशनल बँकेचे वरिष्ठ अधिकारी या तांत्रिक चुकीचा शोध घेत असून, नक्की कोणत्या बिघाडामुळे ग्राहकांच्या खात्यात एवढी मोठी रक्कम दाखवली जात होती, याचा तपास करत आहेत.
