बिहारमधील मुंगेर जिल्ह्यात 'रोझ डे'चे सेलिब्रेशन एका दाम्पत्याला चांगलेच महागात पडले आहे. दारूबंदी असलेल्या राज्यात मद्याचे प्रदर्शन करणे आणि सोशल मीडियासाठी शस्त्रासोबत फोटो काढणे, या कृत्यांमुळे पोलिसांनी या दाम्पत्यावर कारवाईचा बडगा उगारला आहे.
मुंगेर जिल्ह्यातील कांचन देवी नावाच्या महिलेने 'रोझ डे'चे सेलिब्रेशन करतानाचे काही व्हिडिओ आणि फोटो इंस्टाग्रामवर पोस्ट केले होते. या व्हिडिओंमध्ये ती आपल्या पतीला गुलाबाचे फूल देऊन दारू देताना दिसत आहे. मात्र, या 'रील'च्या नादात तिने कायद्याचे उल्लंघन केल्याने आता तिला पोलीस कोठडीची हवा खावी लागण्याची शक्यता आहे.
काय आहे संपूर्ण प्रकार?
कांचन देवीने स्वतःच हे व्हिडिओ फेसबुक आणि इंस्टाग्रामवर शेअर केले होते. व्हिडिओमध्ये कांचन तिच्या पतीला गुलाबाचे फूल देते आणि त्यानंतर वाईनचा ग्लास भरून हातामध्ये दारूची बाटली घेताना दिसते. बिहारमध्ये दारू पिणे आणि तिचे प्रदर्शन करणे हा गंभीर गुन्हा आहे. या वादानंतर कांचनचा आणखी एक फोटो समोर आला, ज्यामध्ये ती एका ब्युटी पार्लरमध्ये पिस्तुल घेऊन 'पोज' देताना दिसत आहे. या फोटोमुळे पोलिसांच्या तपासाला वेग आला.
(नक्की वाचा- मुलगी नागिन बनून गायब झाल्याची चर्चा, बेडवर सापडली 5 फुटी कात; अखेर 'त्या' VIDEO नं उडवला पोलिसांचाही थरकाप!)
पोलिसांचा छापा आणि कारवाई
मुंगेरचे पोलीस अधीक्षक (SP) सय्यद इम्रान मसूद यांनी या प्रकरणाची गंभीर दखल घेत एक विशेष पथक स्थापन केले. पोलिसांनी तत्काळ कांचनच्या घरावर छापा टाकला. तपासात असे निष्पन्न झाले की, फोटोतील पिस्तुल हे दीनदयाल चौक येथील रहिवासी विशाल कुमार यांच्या नावावर असलेले परवानाधारक शस्त्र आहे. जरी शस्त्र कायदेशीर असले, तरी परवाना नसलेल्या व्यक्तीला सोशल मीडियासाठी शस्त्र देणे हा कायद्याचा भंग आहे.
(नक्की वाचा- Ajit Pawar Plane Crash VIDEO: अजित पवारांच्या अपघाताचं नवीन CCTV Footage, विमानतळावर नेमकं काय घडलं?)
एसपी मसूद यांनी सांगितले की, "शस्त्रांचे सार्वजनिक प्रदर्शन करणे आणि दारूसारख्या प्रतिबंधित पदार्थांना प्रोत्साहन देणे हे गंभीर गुन्हे आहेत. आम्ही कांचन देवी आणि शस्त्राचा मालक विशाल कुमार या दोघांविरुद्ध गुन्हा दाखल केला आहे. या प्रकरणाचा सखोल तपास सुरू असून पुढील कायदेशीर कारवाई केली जात आहे."
Track Latest News Live on Marathi.NDTV.com and get news updates from India and around the world
