पुणे शहरात कस्टम्स विभागाने मोठी कारवाई करत परकीय चलन हवाला रॅकेटचा पर्दाफाश केला आहे.  या प्रकरणी दोन जणांना अटक करण्यात आली आहे. या रॅकेटद्वारे मोठ्या प्रमाणात परकीय चलनाची अवैध देवाणघेवाण होत असल्याची माहिती कस्टम्स विभागाला मिळाली होती. त्यानुसार, कस्टम्स विभागाने सापळा रचून दोघांना रंगेहाथ पकडले. कस्टम्स विभाग या प्रकरणी अधिक तपास करत आहे. या रॅकेटमध्ये आणखी काही जणांचा सहभाग असण्याची शक्यता वर्तवली जात आहे.

गेनबिटकॉइन क्रिप्टोकरन्सी घोटाळ्या प्रकरणी सीबीआयने देशभरात 60 ठिकाणी छापे टकले आहेत. CBI ने दिल्ली एनसीआर, पुणे, चंदीगड, नांदेड, कोल्हापूर, बेंगळुरू आणि इतर काही शहरांमध्ये छापे टाकले आहे. गेनबिटकॉइन ही एक पोंझी स्कीम 2015 मध्ये अमित भारद्वाज (मृत), अजय भारद्वाज आणि त्यांच्या एजंट नेटवर्कने सुरू केली होती

ही स्कीम व्हेरिअबलटेक प्रा. लि. नावाच्या कंपनीच्या नावाखाली www.gainbitcoin.com अश्या वेबसाइट्सद्वारे चालवली जात होती. या स्कीममध्ये मोठ्या प्रमाणात फसवणूक आणि मनी लाँडरिंगचा आरोप झाल्यानंतर देशभरात अनेक एफआयआर नोंदवण्यात आले 

घोटाळ्याचे प्रमाण लक्षात घेता, जम्मू आणि काश्मीर, पंजाब, चंदीगड, दिल्ली, पश्चिम बंगाल, मध्य प्रदेश, कर्नाटक आणि महाराष्ट्र यासह विविध राज्यांमध्ये गुन्हा नोंदविल्यानंतर सर्वोच्च न्यायालयाने सीबीआयकडे हस्तांतरित केले होते.

कवी मनाचे महान योध्दे छत्रपती संभाजी महाराज यांच्या नावाने यावर्षी पासून दिला जाणार पहिला "महाराष्ट्र प्रेरणा गीत पुरस्कार" स्वातंत्र्यवीर विनायक दामोदर सावरकर यांच्या "अनादी मी अनंत मी.. " या गीताला देण्यात येणार आहे. सांस्कृतिक कार्यमंत्री आशिष शेलार यांनी फ्रान्सच्या मार्सेलिस समुद्र किनाऱ्यावरुन ही घोषणा केली

महाराष्ट्रभूषण आणि अन्य सन्मानाचे पुरस्कार महाराष्ट्र शासनातर्फे देण्यात येतात. त्याच पद्धतीने दरवर्षी एका प्रेरणा गीताला महाराष्ट्र शासनाच्या सांस्कृतिक कार्य विभागातर्फे "छत्रपती संभाजी महाराज महाराष्ट्र प्रेरणा गीत" पुरस्कार देऊन गौरविण्यात येणार आहे. 2 लाख रुपये रोख रक्कम आणि स्मृतिचिन्ह असे या पुरस्काराचे स्वरूप असेल.

सिल्लोड तालुक्यात बनावट जन्म दाखले बनवण्यासाठी अतिरेकी संघटनेचा हात आहे, असा गंभीर आरोप भाजपाचे माजी खासदार किरीट सोमय्या यांनी केला आहे. दोन मुस्लिम नेत्यांकडून सिल्लोड तालुक्यात बनावट जन्म दाखले बनवले जात असल्याचा आरोप त्यांनी केला आहे. या प्रकरणात मुख्यमंत्री देवेंद्र फडणवीस यांच्याकडं विशेष फॉरेन्सिक  इन्वेस्टीगेशनची मागणी करणार असल्याचं त्यांनी सांगितलं.

सरकारी कर्मचाऱ्यांसाठी आनंदाजी बातमी आहे. सरकारी कर्मचाऱ्यांचा महागाई भत्ता 50 टक्क्याहून 53 टक्के झाला आहे. सातव्या वेतन आयोगानुसार ही वाढ करण्यात आली आहे. फेब्रुवारी महिन्याच्या पगारात हा भत्ता देण्याचे आदेश देण्यात आले आहेत. 

दिल्लीमध्ये 1984 साली झालेल्या शीख विरोधी दंगलीच्या प्रकरणात काँग्रेसचे माजी खासदार सज्जन कुमारला जन्मठेपेची शिक्षा सुनावण्यात आली आहे. दिल्लीतल्या राऊज एवेन्यू कोर्टानं 12 फेब्रुवारी रोजी या प्रकरणात त्याला दोषी असल्याचा निकाल दिला होता. 1 नोव्हेंबर 1984 रोजी दिल्लीतल्या सरस्वती विहार भागात जसवंत सिंह आणि त्यांचा मुलगा तरुणदिप सिंह यांच्या हत्या प्रकरणात ही शिक्षा सुनावण्यात आली आहे. 

स्थानिक स्वराज्य संस्था निवडणुकांसंबंधातील सुनावणी पुढे ढकलली, पुढच्या मंगळवारी होणार सुनावणी

स्थानिक स्वराज्य संस्था निवडणुकांसंदर्भात आज सर्वोच्च न्यायालयात सुनावणी होणार होती, मात्र ती पुढे ढकलण्यात आली आहे. 

नाशिक कुंभ मेळ्यासंदर्भात उद्या महत्त्वाची बैठक

मुख्यमंत्री देवेंद्र फडणवीसांच्या अध्यक्षतेखाली मंत्री गिरीश महाजन यांनी बोलावली बैठक

रस्ते, विमान, रेल्वे वाहतुकीसंदर्भात होणार महत्त्वाची चर्चा

दोन वर्षांनंतर नाशिकमध्ये होणार कुंभमेळा

सरपंच संतोष देशमुख यांच्या हत्या प्रकरणाला 77 दिवस उलटून गेले आहेत. असे असतानाही या प्रकरणातील आरोपी कृष्ण आंधळे हा अद्याप फरारच आहे. कृष्णा आंधळेला तत्काळ अटक करावी यासह नऊ मागण्या देशमुख कुटुंबीय आणि ग्रामस्थांनी प्रशासनाला दिल्या होत्या. मात्र या मागण्या मान्य होण्यास विलंब होत असल्याने आजपासून देशमुख कुटुंबीय आणि मसाजोग ग्रामस्थांनी अन्नत्याग आंदोलन सुरू केले आहे. 

आता या आंदोलनात संतोष देशमुख यांच्या आई आणि त्यांची मुलगी वैभवी यादेखील सहभागी झाल्या आहेत. या ठिकाणी ग्रामस्थ देखील आंदोलनात सहभागी झाले असून काही वेळातच मराठा आंदोलन म्हणून जरंगे पाटील हेदेखील आंदोलनासाठी मस्साजोगमध्ये दाखल होणार आहेत. मागण्या मान्य न झाल्यास आंदोलन आणखी तीव्र करण्याचा विचार आहे यावेळी आंदोलकांकडून देण्यात आला आहे.

हिंगोलीतील शरद पवार यांचा दौरा रद्द झाला आहे, शरद पवार हे आज संत नामदेव महाराज यांचे जन्मस्थळ असलेल्या नरसी नामदेव येथे भेट देणार होते त्याचबरोबर हिंगोली शहरात स्वातंत्र्यसैनिक माणिकराव देशमुख टाकळ गव्हाणकर यांच्या शताब्दी वर्षपूर्ती गौरव सोहळ्यात उपस्थित राहणार होते. कार्यक्रमाची जय्यत तयारी देखील करण्यात आली होती,  मात्र अचानक शरद पवारांचा दौरा रद्द झाला आहे, महिनाभरापूर्वी देखील शरद पवार यांचा हिंगोली दौरा आयोजित करण्यात आला होता. मात्र शरद पवारांची तब्येत खालावल्याने तेव्हा देखील दौरा रद्द करावा लागला होता , आत्ता पुन्हा एकदा शरद पवारांचा दौरा रद्द झाल्याने कार्यकर्त्यांचा हिरमोड झाला आहे.. तर प्रदेशाध्यक्ष जयंत पाटील हे नांदेडहून हिंगोलीकडे रवाना झाले आहेत..

सर्वोच्च न्यायालयात स्थानिक स्वराज्य संस्थेची सुनावणी होण्याची शक्यता कमी

कोर्ट क्रमांक 3 दुपारी 1 वाजेपर्यंतच बसणार आहे. 

त्यामुळे स्थानिक स्वराज्य संस्थेच्या प्रकरण 29 वर सुनावणी होण्याची शक्यता कमी

याचिकाकर्ते आणि राज्य सरकार दोन्ही पक्षांना पुढील तारीख घेण्यासाठी प्रकरण मेन्शन करावे लागणार 

त्यानंतर पुढील तारीख लवकरात लवकर घ्यावी लागेल. 

मार्चच्या पहिल्या आठवड्यात सुनावणी झाली तरच निवडणूका लवकर होण्याची शक्यता. 

परंतु पुढील आठवड्यात सुनावणी झाली नाही तर पावसाळ्यानंतरच स्थानिक स्वराज्य संस्थांच्या निवडणूका होतील.

रत्नागिरी तालुक्यातील प्रसिद्ध तीर्थक्षेत्र गणपतीपुळे येथील समुद्रकिनाऱ्यावर सागरी कासव संरक्षण आणि संवर्धन मोहिमेत सागरी कासवांची 47 पिल्ले समुद्रात सुरक्षितपणे सोडण्यात आली. गणपतीपुळे येथे समुद्र किनाऱ्यावर कांदळवन दक्षिण विभाग परिक्षेत्र रत्नागिरीच्या वतीने सागरी कासव संरक्षण आणि संवर्धन मोहीम अंतर्गत अंडी उबवणी केंद्रामध्ये कासवांच्या संरक्षित प्रजाती तयार केल्या जात आहेत. त्यामध्ये ठेवण्यात आलेल्या घरट्यांमधील सुमारे 137 कासवांची पिल्ले किनाऱ्यावर संरक्षित करण्यात आली होती. संरक्षित केलेल्या अंड्यांमधील 47 पिल्लांना सुरक्षितरित्या गणपतीपुळे अंडी उबवणी केंद्रासाठी नियुक्ती करण्यात आलेले कासवमित्र वीरेंद्र सुर्वे व मालगुंड येथील कासवमित्र आदित्य मयेकर यांच्या विशेष सहकार्यान गणपतीपुळे समुद्रात सोडण्यात आलं आहे.

श्रीतुळजाभवानी मातेच्या चरणी ठाणे येथील भक्ताने 540 ग्रॅम  वजनाचा सोन्याचा मुकुट अर्पण केला आहे. देवसमर्पनाच्या भावनेतून देवीसाठी सुवर्णालंकार अर्पण केल्याचे भाविकांनी सांगितले. श्री तुळजाभवानी मंदिर संस्थान तर्फे भाविक कुटुंबीयांचा देवीची प्रतिमा व महावस्त्र देऊन सत्कार करण्यात आला.

इंदापूरचं ग्रामदैवत इंद्रेश्वर महादेव रथोत्सवानिमित्त पंचक्रोशीतील विविध कावडींच्या मंगल कलशातून इंद्रेश्वर शंभू महादेवाच्या पिंडीवर जलाभिषेक करण्यात आलाय.यावेळी कांबळे बंधू यांची शंभर वर्षाची परंपरा असलेल्या मानाच्या कावडीचं पारंपारिक वाद्याच्या गजरात आगमन झालं.

ग्रामविकास मंत्री जयकुमार गोरे यांचे वडील भगवानराव रामचंद्र गोरे यांचे आज पहाटे दीर्घ आजाराने दुःखद निधन झाले. मागील काही दिवस त्यांच्यावर पुण्यातील रुग्णालयात उपचार सुरू होते. उपचारादरम्यान त्यांची प्राणज्योत मालवली. त्यावर बोराटवाडी ता. माण जिल्हा सातारा येथे सायंकाळी 4 वाजता अंत्यविधी होणार आहे.

नंदुरबार जिल्ह्यातल्या शहादा तालुक्यातील तिजोरा शिवारातील एका शेतातील विहिरीत बिबट्या पडून त्याचा मृत्यू झाल्याची घटना समोर आली आहे. साहेबराव गायकवाड यांच्या शेतातील विहीरीत हा मृत बिबट्या आढळून आला. शेतात पाणी सोडल्यानंतर मोटार पाणी सोडतांना त्रास देत असल्याने विहीरीत पाहीले असता त्यांना मृत बिबट्या आढळून आला. शेतातील मेढींच्या सुगाव्याने हा बिबट्या आला मात्र विहीरीची कल्पना न आल्याने तो विहिरीत पडून मृत पावल्याचा अंदाज वर्तवल्या जात आहे. 

वर्ध्यात एका रुग्णामध्ये जीबीएसची लक्षणं आढळून आली आहेत

साहूर परीसरातील 85 वर्षीय व्यक्तीला जीबीएस सदृश लक्षणे दिसून आली आहेत.

रुग्णावर नागपूर येथे उपचार सुरू आहे, लॅबचे रिपोर्ट अद्याप मिळू शकलेले नाहीत