Piyush Pandey Death: जाहिरात क्षेत्रात आपल्या कामातून क्रांती घडवणारे आणि कोट्यवधी भारतीयांच्या मनात घर करून राहिलेले पियूष पांडे यांचे शुक्रवारी मुंबईत निधन झाले. ते 70 वर्षांचे होते. त्यांनी 'फेविकॉल' एशियन पेंट्स' सह अनेक ब्रँडसाठी अफलातून संकल्पना आणणाऱ्या जाहिराती बनवल्या, ज्यामुळे भारतीय जाहिरात क्षेत्र कायमचं बदललं.
पण, त्यांच्या हजारो कामांमध्ये एक जाहिरात आजही प्रत्येकाच्या चेहऱ्यावर हसू आणते ...ती म्हणजे 1994 साली प्रदर्शित झालेली कॅडबरी डेअरी मिल्क'ची जाहिरात. आठवतेय ना? क्रिकेटच्या मैदानात एक तरुण मुलगी उत्साहाच्या भरात धावत जाते आणि आनंदाने नाचू लागते! सुरक्षा रक्षक तिला थांबवायचा प्रयत्न करतात, पण ती त्यांना चुकवून आनंदात गरगर फिरते, कारण तिच्या आवडत्या खेळाडूने सिक्सर मारलेला असतो. पडद्यावर शब्द येतात "असली स्वाद जिंदगी का."
ही जाहिरात नुसती एक टीव्ही कमर्शिअल नव्हती; तो एक जल्लोषाचा क्षण होता. आणि या क्षणामागची कल्पना होती पियूष पांडे यांची, एका बोर्डिंग पासवर लिहिलेली गाण्याची धून आणि ती सहजपणे नाचणारी मुलगी शिमोनाराशी (Shimona Rashi). 'सोशल मीडिया' नव्हता, तरी ही मुलगी रातोरात 'स्टार' बनली! पीयूष पांडे यांनी हे सोपं यश कसं मिळवलं, त्याची ही खास गोष्ट.
( नक्की वाचा : Bira 91 : फक्त एक शब्द काढला आणि बिअर ब्रँड अडचणीत; 748 कोटींचं नुकसान... वाचा काय घडलं? )
कॅडबरीला मोठी गरज आणि विमानात मिळालेली 'आयडिया'
ही गोष्ट आहे 1994 ची. तेव्हा कॅडबरी चॉकलेट फक्त लहान मुलांसाठी आहे आणि पालकच ते गिफ्ट देतात, अशी लोकांची समजूत होती. कंपनीला वाटत होतं की, मोठ्या माणसांनीही हे चॉकलेट आवडीने खाल्लं पाहिजे. थोडक्यात, चॉकलेटला 'मोठ्यांसाठी कूल' बनवायचे मोठे आव्हान होते.
या काळात पियूष पांडे अमेरिकेत सुट्टीवर होते. त्यांना बॉसचा महत्त्वाचा फोन आला. कॅडबरीला काहीतरी जबरदस्त हवं होतं, नाहीतर त्यांना हे काम गमवावे लागले असते. पांडे यांनी लगेच मुंबईचे पहिले विमान पकडले. अटलांटिक महासागरावरून प्रवास करताना, त्यांच्या मनात एक विचार आला: "प्रत्येक माणसात एक खरा आनंद दडलेला असतो." त्यांनी आपल्या विमानाच्या बोर्डिंग पासच्या मागच्या बाजूला या विचाराची काही वाक्ये पटकन लिहून काढली.
( नक्की वाचा : Water War : पाकिस्तानला 'पाण्या'वरून नवा झटका; भारतानंतर अफगाणिस्तानही करणार कोंडी )
15 मिनिटांत तयार झाले संगीत
मुंबईला परतल्यावर पांडे यांनी त्यांचे मित्र, प्रसिद्ध संगीतकार लुई बँक्स (Louis Banks) यांना बोलावले. लुई बँक्स यांनी अवघ्या 15 मिनिटांत गाण्याची धून तयार केली. इंग्लिशमध्ये हे गाणे गायले गेले, पण पांडे यांना वाटले की यात भारतीय भावना असायला हव्यात, जेणेकरून ते थेट लोकांच्या मनाला भिडेल.
त्यांनी लुई बँक्सच्या धुनवर हिंदीमध्ये नवे शब्द लिहिले आणि ही धून गाण्यासाठी त्यांनी प्रसिद्ध गायक शंकर महादेवन यांच्याशी संपर्क साधला. महादेवन यांच्या गोड आणि हळुवार आवाजात जेव्हा "कुछ स्वाद है..." हे शब्द आले, तेव्हा त्या गाण्याला एक खास जादू मिळाली.
गाणं आणि कल्पना तयार होती, आता फक्त एक चेहरा हवा होता. पण, त्यांना कोणतीही मोठी, ग्लॅमरस मॉडेल नको होती. त्यांना एक अशी व्यक्ती हवी होती, जी नाचताना विचार करणार नाही, तर खरा आनंद व्यक्त करेल.
शिमोनाराशीची निवड
इथे एन्ट्री झाली शिमोनाराशीची. ती व्यावसायिक नृत्यांगना नव्हती. आणि हीच गोष्ट तिच्या निवडीसाठी सर्वात महत्त्वाची ठरली. तिचा नाच नैसर्गिक, मोकळा होता. शिकवलेला नव्हता. पियूष पांडे यांना तेच हवं होतं.
एकाच प्रयत्नात रेकॉर्ड
या जाहिरातीचे शूटिंग मुंबईच्या ब्रेबॉर्न स्टेडियमवर झाले. शिमोनाराशीचा नाचण्याचा सिक्वेन्स केवळ एकाच प्रयत्नात (Single Take) शूट करण्यात आला. कोणताही 'रि-टेक' नाही, कोणती मोठी तयारी नाही – फक्त ती, चॉकलेट आणि संगीत! तिचा तो उत्साहाचा नाच, हाफ-हॉप आणि हाफ-स्पिन (अर्धे उडी मारणे आणि अर्धे फिरणे) हेच जाहिरातीचे सर्वात आवडते दृश्य बनले.
जाहिरात टीममधील एका सदस्याने नंतर सांगितले की, "तिला नाचताना पाहिलं, तेव्हाच आम्हाला खात्री झाली. हे नाचण्यासाठी केलेलं नाही, तर मनातून आलेलं होतं."
सर्वात यशस्वी जाहिरात आणि मोठा वारसा
ही जाहिरात टीव्हीवर दिसू लागताच ती खूप लोकप्रिय झाली. क्रिकेट मॅच आणि बातम्यांच्या मध्ये ही जाहिरात पाहणाऱ्या पिढीसाठी 'कॅडबरी गर्ल' म्हणजे खऱ्या आनंदाची व्याख्या ठरली. 'ओगिल्वी' कंपनीतील एका अधिकाऱ्याने सांगितले, "या जाहिरातीने लोकांना सांगितले की चॉकलेट लहान मुलांसाठी नाही, तर तुमच्यातील लहान मुलासाठी आहे."
या जाहिरातीने जाहिरात क्षेत्रातील मोठे पुरस्कार जिंकले. इतकेच नाही, तर या जाहिरातीला "शतकातील सर्वोत्तम मोहीम" (Campaign of the Century) म्हणूनही गौरवण्यात आले.
वारसा आजही जिवंत
अनेक वर्षांनंतर, 2020 मध्ये 'ओगिल्वी'ने याच कल्पनेवर आधारित एक नवी जाहिरात बनवली.... यावेळी एक मुलगा धावतो, जेव्हा एक महिला खेळाडू जिंकते. नवीन काळात बदल करतानाही पीयूष पांडे यांनी एक अट ठेवली: "तुम्ही सर्व करा, पण जाहिरातीचे संगीत बदलू नका."
आजच्या सोशल मीडिया आणि ट्रेंडच्या काळातही, विमानात जन्मलेली आणि एका नैसर्गिक नृत्यांगनेच्या तालावर सेट केलेली ती धून आजही लोकांच्या हृदयाला स्पर्श करते.
पियूष पांडे यांनी केवळ जाहिराती बनवल्या नाहीत; त्यांनी आठवणी बनवल्या आणि साध्या-साध्या क्षणांना खऱ्या अर्थाने 'खास' बनवले.
Track Latest News Live on Marathi.NDTV.com and get news updates from India and around the world
