How To Control Bad Cholesterol: तेलकट, तिखट आणि जंकफुडच्या अति सेवनामुळे कित्येक आजारांचा सामना करावा लागतो, यापैकीच एक समस्या म्हणजे शरीरामध्ये खराब कोलेस्टेरॉलची (LDL) पातळी वाढणे. तुम्ही देखील या समस्येचा सामना करत असाल तर तुम्हाला तुमच्या घरामध्येच उपाय सापडेल. शरीरात वाढलेल्या खराब कोलेस्टेरॉलची पातळी कमी करण्यासाठी डाएटमध्ये दह्याचा समावेश करावा. पण दह्यामध्ये अळशीच्या बिया मिक्स करुन खाणे अधिक फायदेशीर ठरेल.
दही आणि अळशीचे सेवन कसे करावे? कोलेस्टेरॉलची पातळी कशी होईल कमी?
अळशीच्या बियांमध्ये विघटनशील फायबर असते, या फायबरमुळे आतड्यांमधील खराब कोलेस्टेरॉल बाहेर फेकले जाण्यास मदत मिळते. तर दह्यातील प्रोबायोटिक्समुळे अन्नाचे पचन होण्यास मदत मिळते. अळशीच्या बियांमध्ये ओमेगा 3 फॅटी अ‍ॅसिडचे प्रमाण जास्त असते. या घटकामुळे शरीरातील सूज कमी होण्यास आणि हृदयाचे आरोग्यही निरोगी राहण्यास मदत मिळते. महत्त्वाचे म्हणजे याद्वारे शरीरातील खराब कोलेस्टेरॉलची पातळी कमी होण्यास आणि चांगल्या कोलेस्टेरॉलची पातळी वाढण्यास मदत मिळते.
(नक्की वाचा: Health Tips: कोणत्या धान्याची पोळी खाल्ल्यास कोलेस्ट्रॉलची समस्या होईल कमी)
अळशीच्या बियांमध्ये लिग्नन्स नावाचे कम्पाउंड आहे, ज्यामध्ये अँटी-ऑक्सिडंट्स गुणधर्मांचा समावेश असतो. लिग्नन्स कम्पाउंडमुळे खराब कोलेस्टेरॉलची पातळी देखील नियंत्रणात राहण्यास मदत मिळते.
दही आणि अळशीचे सेवन कसे करावे?
- सर्वप्रथम अळशीच्या बिया एका पॅनमध्ये भाजून घ्या.
- तुम्हाला हवे असल्यास बिया कच्च्या देखील खाऊ शकता, पण भाजलेल्या बियांची चव अधिक चांगली लागते.
- भाजलेल्या अळशीच्या बिया मिक्सरच्या भांड्यामध्ये वाटून पावडर तयार करा.
- नियमित एक वाटी दह्यामध्ये एक ते दोन चमचे अळशीच्या बियांची पावडर मिक्स करून त्याचे सेवन करा.
- सकाळच्या नाश्त्यामध्ये किंवा दिवसभरात कधीही तुम्ही याचे सेवन करू शकता.
(Disclaimer: NDTV Marathi या माहितीची जबाबदारी घेत नाही. अधिक माहितीसाठी तज्ज्ञ/डॉक्टरांचा सल्ला घ्यावा.)
Track Latest News Live on Marathi.NDTV.com and get news updates from India and around the world
