Chhava Movie : 'छावा' चित्रपटाच्या वादात उदयनराजेंची उडी, दिग्दर्शकाला केली महत्त्वाची सूचना

Chhava Movie : छत्रपती संभाजीराजेंच्या आयुष्यावर आधारित 'छावा' हा हिंदी चित्रपट लवकरच प्रदर्शित होणार आहे. विकी कौशल या सिनेमात मुख्य भूमिका करत आहे. या सिनेमाचा ट्रेलर प्रदर्शित झाला आहे. या ट्रेलरनंतर चित्रपटातील काही प्रसंगावर आक्षेप घेण्यात आले आहेत. या सर्व वादावार छत्रपती शिवाजी महाराजांचे थेट वंशज आणि साताऱ्याचे खासदार छत्रपती उदयनराजे भोसले यांनी उडी घेतली आहे.

('NDTV मराठी' चं अधिकृत व्हॉट्सअ‍ॅप चॅनल जॉईन करा )
 

उदयनराजेंनी दिली सूचना

उदयनराजेंनी या चित्रपटाचे दिग्दर्शक लक्ष्मण उतेकर यांना फोन करुन महत्त्वाची सूचना दिली आहे. या चित्रपटात काही आक्षेपार्ह घटना दाखवल्या असतील तर त्या डिलीट कराव्यात, असं उदयनराजेंनी सांगितलं आहे.

लोकांपर्यंत चांगला चित्रपट लवकरात लवकर प्रदर्शित करावा. छत्रपती शिवाजी महाराज आणि छत्रपती संभाजी महाराज यांनी देशासाठी, धर्मासाठी केलेले योगदान हे व्यवस्थित आणि चांगल्या पद्धतीनं जगासमोर यावेत यासाठी प्रयत्न करावेत. इतिहास तज्ज्ञ व इतिहास अभ्यासक यांना हा चित्रपट दाखवून त्याच्याबद्दलची व्यवस्थित मांडणी करूनच हा चित्रपट प्रदर्शित करावा. त्यानंतर समाजामध्ये कोणत्याही गोष्टीचा तिढा निर्माण होणार नाही, असं उदयनराजेंनी सांगितलं आहे. 

( नक्की वाचा : शरद पवारांची तब्येत खालावली! नियोजित कार्यक्रम रद्द )
 

हा चित्रपट इतिहास तज्ज्ञ आणि इतिहास अभ्यासक यांना दाखवून लवकरात लवकर प्रदर्शित करावा, असंही उदयनराजेंनी सांगितलं आहे. त्याचबरोबर या चित्रपटाचं विशेष स्क्रिनिंग साताऱ्यात होणार असल्याची माहिती आहे.

मराठा संघटनेचा विरोध

मराठा क्रांती मोर्चा पुणे शहर यांनी छावा चित्रपटाच्या विरोधात काही दिवसांपूर्वी आंदोलन केले होते. छत्रपती संभाजी महाराजांबाबत चुकीचे आणि खोटे प्रसंग दाखवल्याचा आरोप करत विरोधात आंदोलन केलं. या चित्रपटामध्ये छत्रपती संभाजी महाराज आणि येसूबाई यांच्याबद्दल आक्षेपार्ह प्रसंग दाखवण्यात आल्याचा दावा संघटनेनं केला आहे.

( नक्की वाचा : Republic Day 2025: झेंडा फडकावणे आणि ध्वजारोहण यामध्ये काय आहे फरक? कधी विचार केलाय? )

संभाजीराजे छत्रपतींची भूमिका काय?

'संभाजी महाराजांवर हिंदीत चित्रपट येतोय चांगली गोष्ट आहे. मात्र इतिहासकारांना त्यांनी बोलावून घ्यावं त्यानंतर या चित्रपटबाबत बोलता येईल.  महाराष्ट्रासह जगभरात हा चित्रपट पोहोचणं महत्वाचं आहे.  लक्ष्मण उतेकर यांनी पुन्हा एकदा आमच्याशी बोलावं अजूनही वेळ गेलेली नाही,' असं संभाजीराजे छत्रपती यांनी या विषयावर स्पष्ट केलं आहे.