नवनिर्वाचीत आमदारांना सध्या आमदारा निवासातील रूम दिल्या जात आहेत. पण सध्या आकाशवाणी आमदार निवासातील एक रूम चांगलाच चर्चेत आहे. त्याला कारणही तसेच आहे. त्या रूमसाठी भाचा आडून बसला आहे. कारण ती रूम त्यांच्या मामांची होती. पण मामांचा विधानसभा निवडणुकीत पराभव झाला. त्यामुळे ती रूम आता आपल्याला मिळाली असा त्यांचा हट्ट आहे. तर मामांचा पराभव करून विधानसभेत पोहोचलेल्या आमदारानेही त्याच रूमवर दावा केला आहे. अशा स्थितीत रूम द्याचा कुणाला या कात्रीत प्रशासन सापडले आहे.
('NDTV मराठी' चं अधिकृत व्हॉट्सअ‍ॅप चॅनल जॉईन करा )
काँग्रेसचे जेष्ठ नेते बाळासाहेब थोरात हे विधानसभा निवडणुकीत संगमनेर मतदार संघातून पराभूत झाले. त्यांना आमदार असताना आकाशवाणी आमदार निवासातील रूम देण्यात आली होती. पण आता त्यांच्या या रूमवर त्यांचे भाचे सत्यजित तांबे यांनी दावा केला आहे. सत्यजित हे विधान परिषदेचे आमदार आहेत. त्यासाठी त्यांनी लॉबिंग ही केल्याचे समोर येत आहे. जे आमदार पराभूत झाले आहेत, त्यांच्या रूम या त्यांना पराभूत करणाऱ्या आमदारांना सध्या दिल्या जात आहेत. त्यानुसार संगमनेरचे आमदार अमोल खताळ यांनी ही याच रूमवर दावा केला आहे.
सत्याजित तांबे यांच्याकडे सध्या आमदार निवासातील रूम आहे. ही रूम आधी त्यांचे वडील डॉक्टर सुधीर तांबे आमदार असताना त्यांची होती. असं असताना ही त्यांना आता मामांची ही रूम हवी आहे. बाळासाहेब थोरात यांची रूम मिळवण्यासाठी प्रशासनावर ते वेगळ्या प्रकारे दबाव आणत असल्याचा आरोप अमोल खताळ यांनी केला आहे. प्रत्येक आमदारांना एक रूम उपलब्ध असताना, मात्र तांबे जर दोन रूम घेणार असतील तर आमच्यासारख्या नवख्या आमदारांनी कुठे जायचं असा प्रश्न त्यांनी उपस्थित केला आहे. या प्रकरणी आपण उपमुख्यमंत्री एकनाथ शिंदे यांच्या कानावर विषय घातलेला आहे. तसेच विधानसभा अध्यक्षांना ही या प्रकरणी भेटणार असल्याचे ते म्हणाले.
सत्यजित तांबे यांच्यावर मेहरबानी करणारे प्रशासनातले आणि महायुतीचे नेते कोण याची चर्चा त्यामुळे सुरू झाली आहे. मुळात मनोरा आमदार निवासस्थानाचे काम सुरू आहे. दुसरीकडे मॅजेस्टिक आमदार निवास देखील सध्या बंद आहे. अशा परिस्थितीत आकाशवाणी आमदार निवासमध्येच नव्या आमदारांना रूम उपलब्ध होत आहेत. नव्या आमदारांना मुंबईत आल्यानंतर राहाण्यासाठी अडचण येते. अशा वेळी एकाच आमदाराला दोन दोन रूम कशा दिल्या जातात असं ही ते म्हणाले. याची चौकशी झाली पाहीजे. शिवाय प्रशासनातील ते लोक कोण आहे ते ही शोधले पाहीजे असं त्यांनी सांगितलं.
Track Latest News Live on Marathi.NDTV.com and get news updates from India and around the world
