आयपीएल 2026 चा हंगाम मुंबई इंडियन्ससाठी अत्यंत खराब ठरला आहे. मुंबईचा संघ नवव्या क्रमांकावर फेकला गेल्याने आता फ्रँचायझीमध्ये आत्मचिंतन सुरू झाले आहे. या पार्श्वभूमीवर, कर्णधार हार्दिक पांड्या आणि मुंबई इंडियन्सचे व्यवस्थापन यांच्यात एक अत्यंत महत्त्वाची बैठक पार पडणार आहे. या बैठकीत हार्दिकला संघात कायम ठेवायचे की नाही, याबाबत मोठा निर्णय घेतला जाण्याची शक्यता आहे.
हार्दिक पांड्याचा फ्लॉप शो आणि मॅनेजमेंटचा प्लॅन
2024 मध्ये पुन्हा संघात परतल्यापासून हार्दिकच्या नेतृत्वाखाली मुंबईने तीन पैकी दोन हंगामात अतिशय खराब कामगिरी केली आहे. केवळ 2025 मध्ये संघ प्ले-ऑफपर्यंत पोहोचला होता. 'क्रिकबझ'च्या अहवालानुसार, मुंबई इंडियन्स सध्या कोणताही घाईघाईने निर्णय घेण्याच्या मनस्थितीत नाही. हार्दिकला संघात कायम ठेवायचे, ट्रेड करायचे की रिलीज करायचे, यावर सविस्तर चर्चा होणार आहे.
(नक्की वाचा- Vaibhav Sooryavanshi News: "माझ्यासाठी फक्त दोनच संघांनी बोली का लावली?" : वैभव सूर्यवंशी)
इतर संघांची नजर
हार्दिकला आपल्या संघात घेण्यासाठी इतर फ्रँचायझींनी आतापासूनच रस दाखवला आहे. हार्दिक सध्या अफगाणिस्तानविरुद्धच्या एकदिवसीय मालिकेच्या तयारीत असल्याने, त्याच्या रिकव्हरीमध्ये अडथळा न आणता ही बैठक योग्य वेळी घेतली जाईल.
सूर्यकुमार यादवचं काय?
हार्दिकसोबतच मुंबईचा स्टार फलंदाज सूर्यकुमार यादव याचेही नाव सध्या चर्चेत आहे. सूर्याने नुकतेच इंस्टाग्रामवर मुंबई इंडियन्सला 'अनफॉलो' करून पुन्हा 'फॉलो' केले, ज्यामुळे चाहत्यांमध्ये संभ्रम निर्माण झाला होता. अहवालानुसार, सूर्याचे मुंबई इंडियन्स मधील स्थान सध्या तरी सुरक्षित आहे. यंदाच्या खराब कामगिरीमुळे सूर्यकुमारला भारतीय टी-20 संघातून वगळण्यात आले असून, त्याचे कर्णधारपदही काढून घेण्यात आले आहे. मुंबई इंडियन्स सध्या त्याच्याबाबत कोणताही टोकाचा निर्णय घेण्याच्या विचारात नाही.
(नक्की वाचा- Hero Flex Fuel Bike: पेट्रोलपेक्षा 20 रुपये फ्लेक्स-फ्यूल बाईक किती परवडेल? जाणून घ्या संपूर्ण बचतीचे गणित)
मुंबई इंडियन्सच्या सूत्रांनी दिलेल्या माहितीनुसार, फ्रँचायझी पुन्हा एकदा एकत्र येईल आणि संपूर्ण हंगामाचा आढावा घेईल. खेळाडू आणि संघ या दोघांच्या हिताचा विचार करूनच अंतिम निर्णय घेतला जाईल. मात्र, सलग अपयशामुळे मुंबईच्या गोटात मोठी खांदेपालट होणार हे आता स्पष्ट दिसत आहे.
Track Latest News Live on Marathi.NDTV.com and get news updates from India and around the world
