IPL 2026: खर्च 118 कोटी आणि परफॉर्मन्स 'झिरो'! आयपीएल 2026 मधील महागड्या खेळाडूंचा असा झालाय 'गेम'

IPL 2026: आयपीएल 2026 च्या हंगामात रॉयल चॅलेंजर्स बेंगळुरू वगळता इतर सर्व संघांनी आतापर्यंत प्रत्येकी 3 मॅच खेळल्या आहेत. स्पर्धेचे हे सुरुवातीचे दिवस असले तरी, सध्याचा कल पाहता लिलावातील सर्वात महागडे खेळाडू अद्याप आपली जादू दाखवू शकलेले नाहीत. राजस्थान रॉयल्सचा फिरकीपटू रवी बिश्नोई वगळता इतर कोणत्याही मोठ्या खेळाडूला आपल्या किमतीला साजेसा खेळ करता आलेला नाही.

आयपीएल 2026 मधील सर्वात जास्त मानधन घेणाऱ्या पहिल्या 10 खेळाडूंवर एकूण 125.20 कोटी रुपये खर्च करण्यात आले आहेत. आपण यामध्ये चांगली कामगिरी करणाऱ्या रवी बिश्नोईचे (7.20 कोटी रुपये) नाव वगळले, तर उरलेल्या 9 खेळाडूंवर तब्बल 118 कोटी रुपये खर्च झाले आहेत. मात्र, हे नऊही खेळाडू अद्याप मैदानात पूर्णपणे अपयशी ठरल्याचे दिसत आहे.

आयपीएल 2026 मधील सर्वाधिक मानधन घेणाऱ्या टॉप 10 खेळाडूंची कामगिरी:

1. कॅमेरून ग्रीन - KKR (25.20 कोटी रुपये)

कोलकाता नाईट रायडर्सने या ऑस्ट्रेलियन ऑलराउंडरवर मोठी बोली लावली होती. मात्र, 4 मॅचमध्ये त्याने केवळ 18.67 च्या सरासरीने 56 रन केले आहेत. बॉलिंगमध्ये त्याने लखनऊ सुपर जायंट्सविरुद्ध 2 ओव्हरमध्ये 28 रन देऊन 1 विकेट घेतली. नंबर 3 किंवा 4 ला बॅटिंग करणाऱ्या ग्रीनकडून मोठ्या खेळीची अपेक्षा आहे.

2. मथीशा पाथिराना - KKR (18 कोटी रुपये)

टी-20 वर्ल्ड कप 2026 दरम्यान पाथिरानाच्या पायाला दुखापत झाली होती. त्याने नेटमध्ये बॉलिंग सुरू केली असली तरी, तो मैदानात कधी परतणार याबाबत अद्याप कोणतीही अधिकृत माहिती नाही.

3. कार्तिक शर्मा - CSK (14.20 कोटी रुपये)

चेन्नई सुपर किंग्सने या आक्रमक युवा खेळाडूला मोठी रक्कम देऊन संघात घेतले. त्याने खेळलेल्या 3 मॅचमध्ये केवळ 18, 1 आणि 6 असे रन्स केले आहेत.

( नक्की वाचा : KKR vs LSG : Out की Not Out? केकेआरसोबत झाला धोका! बड्या खेळाडूबाबत थर्ड अंपायरच्या निर्णयावर मोठा वाद )
 

4. प्रशांत वीर - CSK (14.20 कोटी रुपये)

सीएसकेने या आणखी एका युवा खेळाडूवर मोठा डाव लावला होता. आरसीबीविरुद्ध त्याने 43 रनची आशादायक खेळी केली होती, परंतु त्या व्यतिरिक्त अद्याप त्याला विशेष काही करता आलेले नाही.

5. लियाम लिव्हिंगस्टोन - SRH (13 कोटी रुपये)

सनरायझर्स हैदराबादकडून खेळणाऱ्या या ऑल राऊंडरनं आतापर्यंत फक्त 1 मॅच खेळली असून त्यात त्याने केवळ 14 रन केले आहेत.

( नक्की वाचा : CSK vs PBKS : चेन्नईचा 'तो' मास्टर प्लॅन सलग पुन्हा फसला, हुकमी एक्काच ठरतोय पत्त्याचा बंगला ! )
 

6. मुस्तफिजुर रहमान - KKR (9.20 कोटी रुपये)

बांगलादेशच्या या फास्ट बॉलरला आयपीएल 2026 सुरू होण्यापूर्वीच स्पर्धेत खेळण्यास बंदी घालण्यात आली होती.

7. जोश इंग्लिस - LSG (8.60 कोटी रुपये)

हा ऑस्ट्रेलियन खेळाडू अद्याप एकही मॅच खेळलेला नाही.

8. आकिब नबी - DC (8.40 कोटी रुपये)

जम्मू-काश्मीरचा हा स्टार वेगवान बॉलर अजूनही मैदानात उतरण्याची वाट पाहत आहे.

9. रवी बिश्नोई - RR (7.20 कोटी रुपये)

महागड्या खेळाडूंच्या यादीत आतापर्यंतची सर्वोत्तम कामगिरी रवी बिश्नोईचीच राहिली आहे. त्याने 3 मॅचमध्ये 7 विकेट्स घेत आपली निवड सार्थ ठरवली आहे.

10. जेसन होल्डर - GT (7.20 कोटी रुपये)

वेस्ट इंडिजचा हा अनुभवी ऑलराउंडर अद्याप एकही मॅच खेळलेला नाही.