Nagpur News: नागपूरमधील वाहतूक सुरळीत करण्यासाठी आणि प्रवाशांच्या सुरक्षिततेसाठी तयार करण्यात आलेला बर्डी फ्लायओव्हरवरील स्पीड ब्रेकर प्रवाशांसाठी डोकेदुखी ठरत आहे. पुलावर बसवलेला स्पीड ब्रेकर अत्यंत मोठा आणि चुकीच्या पद्धतीने बांधल्यामुळे तो आता सुरक्षिततेऐवजी अपघाताचे कारण बनला आहे.
बर्डी पुलावरील हा स्पीड ब्रेकर इतका मोठा आहे की, वेगाने येणाऱ्या दुचाकी आणि चारचाकी वाहनांच्या चालकांना त्याचा अंदाज लगेच येत नाही. अचानक समोर स्पीड ब्रेकर आल्यानंतर तातडीने गाडीचा वेग नियंत्रित करणे वाहनचालकांना शक्य होत नाही. अशा परिस्थितीत अनेक वाहने वेगाने ब्रेकरवरून जातात, ज्यामुळे ती अनियंत्रित होतात.
दुचाकीस्वार जखमी, तरुणी रस्त्यावर पडली
या चुकीच्या डिझाइनमुळे अनेक दुचाकी चालक ब्रेकरवरून जात असताना तोल जाऊन रस्त्यावर पडले आहेत आणि जखमी झाले आहेत. अतिशय मोठा स्पीड ब्रेकर असल्याने एका दुचाकीवरील तरुणीचा तोल गेला आणि ती रस्त्यावर पडली, ज्यामुळे तिला किरकोळ जखमा झाल्या.
नागरिकांचा प्रशासनावर संताप
ज्या उद्देशाने हा स्पीड ब्रेकर बांधण्यात आला होता, तो उद्देश सफल न होता, उलट यामुळे नागरिकांचा जीव धोक्यात येत आहे. एवढा मोठा आणि धोकादायक स्पीड ब्रेकर बांधणाऱ्या प्रशासनाविरोधात नागरिकांनी तीव्र संताप व्यक्त केला आहे. तातडीने यात सुधारणा न केल्यास मोठे अपघात होण्याची भीती नागरिकांनी व्यक्त केली आहे.
Track Latest News Live on Marathi.NDTV.com and get news updates from India and around the world
