राकेश गुडेकर
सध्या नगर परिषद निवडणुकांची रणधुमाळी सगळीकडे होत आहे. नगराध्यक्षपद हे यावेळी थेट जनतेतून निवडले जाणार आहे. त्यामुळे राजकीय पक्षाने आपल्या ताकदवान उमेदवाराला नगराध्यक्षपदाची उमेदवारी दिली आहे. पण कोकणात दोन अशा नगरपालिका आहेत ज्या ठिकाणी थेट माजी आमदारच रिंगणात उतरले आहेत. त्यामुळे इथली निवडणूक ही राज्यातील इतर नगरपालिका निवडणुकी पेक्षा वेगळी आणि चुरशीची ठरत आहेत. पण माजी आमदारांनी नगराध्यक्षपदाच्या निवडणुकीतच मैदानात उतरावे की नाही याची ही चर्चा आता या शहरांत रंगली आहे.
रत्नागिरी जिल्ह्यातील राजापूर आणि चिपळूण नगरपरिषद निवडणुकीच्या नगराध्यक्षपदासाठी चक्क माजी आमदार निवडणूक रिंगणात उतरले आहे. राजापूर नगराध्यक्षपदासाठी माजी आमदार हुस्नबानू खलिफे हे निवडणूक रिंगणात आहेत. त्या काँग्रेसच्या असून त्या महाविकास आघाडीच्या उमेदवारी असतील. माजी आमदार हुस्नबानू खलिफे या विधान परिषदेवर राहील्या आहेत. काँग्रेसने त्यांना संधी दिली होती. आता त्या काँग्रेस पक्षाकडून नगराध्यक्षपदाची निवडणूक लढत आहेत. नियतीची इच्छा आहे की आपण पुन्हा एकदा राजापूरवासियांची सेवा करावी, म्हणूनच आपण ही निवडणूक लढवत आहोत, असं खलिफे यांनी सांगितलं.
खलिफे यांनी स्पष्ट केले आहे की, ही निवडणूक कोणत्याही राजकीय वादावर नसून, केवळ शहराच्या विकासाच्या मुद्द्यावर लढवली जात आहे. आपल्या मागील आमदारकीच्या कार्यकाळात केलेल्या विकासकामांची लोकांना आठवण आहे. त्यामुळे जनता आपल्याला पुन्हा प्रचंड बहुमताने निवडून देईल, असा विश्वास त्यांनी व्यक्त केला आहे. राजापूर नगराध्यक्षपदाची लढत सध्या तापलेली दिसत आहे. माजी आमदार खलिफे पुन्हा एकदा मैदानात उतरल्याने ही निवडणूक लक्षवेधी ठरली आहे. त्यांच्या समोर महायुतीच्या उमेदवाराचे आव्हान आहे. पण माजी आमदारच मैदानात उतरल्याने ही निवडणूक चुरशीची ठरली आहे.
राजापूर प्रमाणे रत्नागिरीतली दुसरी नगर परिषद ही चिपळूण आहे. या नगर परिषदेच्या नगराध्यक्षपदासाठी ही माजी आमदार रमेश कदम हे निवडणूक रिंगणात उतरले आहेत. ते राष्ट्रवादी शरद पवार गटाचे नगराध्यक्षपदाचे उमेदवार आहेत. रमेश कदम हे चिपळूण विधानसभा मतदार संघातून आमदार म्हणून निवडून आले होते. ते राष्ट्रवादी काँग्रेसचे त्यावेळी उमेदवार होते. त्यांना महाविकास आघाडीचा पाठिंबा आहे. त्यांचे कट्टर विरोधक आणि शिवसेना ठाकरे गटाचे नेते भास्कर जाधव यांनी ही कदम यांना पाठिंबा जाहीर केला आहे. 40 वर्षांमध्ये मी जे नगरपालिकेत पेरलंय ते उगवणार, म्हणजेच त्यांच्या दीर्घकाळच्या नगरपालिकेतील कार्यामुळे त्यांना जनतेचा पाठिंबा मिळेल असा विश्वास त्यांनी व्यक्त केला आहे.
