शरद सातपुते
नगर परिषदेच्या निवडणुका आता शेवटच्या टप्प्यात आहे. प्रचार शिगेला पोहोचला आहे. या निवडणुकीत भाजप विरुद्ध शिवसेना शिंदे गट यांच्यात चांगलाच कलगीतूरा रंगला आहे. भाजप प्रदेशाध्यक्ष रविद्र चव्हाण यांनी या प्रचारात शिंदे सेनेवर टिका करण्याची एकही संधी सोडलेली नाही. याच चव्हाण यांची तक्रार उपमुख्यमंत्री एकनाथ शिंदे यांनी दिल्लीत केली होती अशी चर्चा होती. पण त्यानंतर ही शिंदे सेनेतील अनेक कार्यकर्ते नेते चव्हाण यांनी भाजपच्या गळाला लावले आहे. त्यात त्यांनी आता सांगलीतील वीटा इथं एकनाथ शिंदे यांना डिवचणारे वक्तव्य केले आहे. त्यामुळे निवडणुकीच्या शेवटच्या टप्प्यात शिंदे सेने विरुद्ध भाजप यांच्यातील वाद वाढण्याची शक्यत आहे.
भाजपच्या उमेदवारासाठी सांगली जिल्ह्यातील नगरपालिकांच्या प्रचारासाठी प्रदेशाध्यक्ष रवींद्र चव्हाण आले होते. यावेळी त्यांनी एकनाथ शिंदे यांचे नाव न घेता त्यांची जागा दाखवल्याची चर्चा रंगली होती. दोन नंबर तो दोन नंबरच असतो, हे कुणी विसरू नये असं सांगत त्यांनी मुख्यमंत्री हेच राज्याचे सर्व काही असतात. दोन नंबर तिन नंबर याना महत्व नसतं. यावेळी त्यांनी दिवंगत आर. आर. पाटील यांच्या भाषणाचा दाखला दिला. या माध्यमातून त्यांनी एकनाथ शिंदे यांच्यावर टीका तर केलीच पण त्यांना चिमटा काढत आपण दोन क्रमांकाचे आहात आणि पहिल्या क्रमांकालाच महत्व असते हेच त्यांनी दाखवून दिलं.
राष्ट्रवादी काँग्रेसचे नेते आणि माजी उपमुख्यमंत्री आर. आर. पाटील यांच्या भाषणाचा त्यांनी यावेळी दाखवा दिला. आर. आर. पाटील यांनी विधानसभेत भाषण केले होते. त्यावेळी त्यांनी तत्कालीन महसूल मंत्री एकनाथ खडसे यांना चिमटे काढले होते. त्यावेळी बोलताना ते म्हणाले होते. की खडसे साहेब, दोननंबर तिन नंबर चार नंबर याला काहीच अर्थ नसते. एक नंबरलाच महत्व असते. जर का दुसऱ्या तिसऱ्या क्रमांकाला महत्व असते तर आज आम्ही याबाजूला म्हणजे विरोधात नसतो असं वक्तव्य आर. आर. पाटील यांनी केलं होतं.
त्याच वक्तव्याची री रविद्र चव्हाण यांनी ओढली. ते म्हणाले नंबर दोनला काही किंमत नसते. जो भी है देवाभाऊ ही है, देवा भाऊ सबका भाऊ अशा शब्दात प्रदेशाध्यक्ष रवींद्र चव्हाण यांचा सांगवीच्या विट्यात एकनाथ शिंदेवर अप्रत्यक्ष निशाणा साधला आहे. एकनाथ शिंदे ही गेल्या काही दिवसात भाजप खास करून देवेंद्र फडणवीस यांच्यावर अप्रत्यक्ष टिका करत आहे. रावणाची लंका अहंकाराने जळली असं ही शिंदे म्हणाले होते. त्याला आम्ही लंकेत राहात नाही असं प्रत्युत्तर फडणवीसांनी दिलं होतं. प्रत्येक सभेत शिंदे लाडकी बहीण योजना बंद होवू देणार नाही असं सांगत आहे. मी माझ्या खात्याचा निधी देईन. मी विकास करेन असं सांगत आहेत. त्याला आता भाजपने काऊंटर करण्यास सुरूवात केली आहे.
Track Latest News Live on Marathi.NDTV.com and get news updates from India and around the world
