Krantijyoti Vidyalay Marathi Madhyam Collection:क्रांतिज्योतीची पोरं ठरली राज्यात सुपरहिट, सिनेमाची तगडी कमाई

Krantijyoti Vidyalay Marathi Madhyam Collection: मराठी शाळेच्या अस्मितेला नवा आवाज देणारा ‘क्रांतिज्योती विद्यालय-मराठी माध्यम' हा सिनेमा प्रेक्षकांच्या भेटीला आलाय. प्रेक्षकांकडून सिनेमाला चांगला प्रतिसाद मिळतोय. संपूर्ण महाराष्ट्रभर या सिनेमाची जोरदार चर्चा सुरू आहे. तसेच सोशल मीडियावर आणि बुक माय शोवरही सिनेमा ट्रेंडमध्ये आहे. पहिल्याच वीकेंडला सिनेमाने तब्बल 3.91 कोटी रुपयांची कमाई केलीय. जोरदार कमाई करत हा चित्रपट बॉक्स ऑफिसवर धुमाकूळ घालतोय. 

प्रेक्षक होतायेत भावुक

पहिल्याच दिवसापासून अनेक शहरांमध्ये चित्रपट हाऊसफुल (Krantijyoti Vidyalay Marathi Madhyam Collection) ठरतोय, मराठी शाळेच्या आठवणींमध्ये रमलेले प्रेक्षक भावुक होऊन चित्रपटगृहातून बाहेर पडताना दिसत आहेत. चित्रपटातील आशय, संवाद, भावनिक क्षण आणि वास्तववादी मांडणी यामुळे प्रेक्षकांशी थेट नाळ जुळली आहे. लहानांपासून ते मोठ्यांपर्यंत सर्वांनीच या चित्रपटाला डोक्यावर घेतले आहे.

चित्रपटाच्या प्रभावी कथेची मांडणी, कलाकारांची नैसर्गिक अभिनयशैली, मनाला भिडणारे संगीत आणि प्रत्येक फ्रेममधून जाणवणारी मराठी मातीची ओढ यामुळे हा चित्रपट केवळ एक सिनेमा न राहता एक अनुभव ठरत आहे. समीक्षकांकडूनही या चित्रपटाला भरभरून दाद मिळत असून मराठी चित्रपटसृष्टीतील अनेक नामवंत कलाकारांनी सोशल मीडियावरून या चित्रपटाचे भरभरून कौतुक केले आहे.

दिग्दर्शक हेमंत ढोमेंवर कौतुकाचा वर्षाव

प्रेक्षकांकडून दिग्दर्शक हेमंत ढोमेवर अभिनंदनाचा वर्षाव होतोय. राज्यभरातून त्याला कौतुकाचे मेसेजेस आणि शुभेच्छा मिळत आहेत. अनेक प्रेक्षक चित्रपट पाहिल्यानंतर थेट दिग्दर्शकाला भेटण्याची इच्छा व्यक्त करत आहेत, हीच या कलाकृतीच्या यशाची खरी पावती ठरत आहे.

या यशाबद्दल बोलताना दिग्दर्शक हेमंत ढोमे म्हणालाय की, "प्रेक्षकांचे प्रेम पाहून मी अक्षरशः भारावून गेलो आहे. आमच्या प्रत्येक चित्रपटावर प्रेक्षकांनी भरभरून प्रेम केले आहे, मात्र यावेळी विषय वेगळा होता. एक संवेदनशील विषय प्रेक्षकांसमोर मांडला आणि त्यांनी तो मनापासून स्वीकारला, याचे खूप समाधान वाटते. प्रेक्षकांचा हा प्रतिसाद मला पुढेही अधिक प्रामाणिक आणि त्यांच्या आवडीचे चित्रपट घेऊन येण्याची प्रेरणा देतो. मी सर्व रसिकप्रेक्षकांचे मनःपूर्वक आभार मानतो."

(नक्की वाचा: Punha Ekda Sade Made Teen Marathi Movie: नाताळची खास भेट! 'कुरळे ब्रदर्स' या तारखेला येणार प्रेक्षकांच्या भेटीला)

‘क्रांतिज्योती विद्यालय - मराठी माध्यम' चित्रपट प्रदर्शित झाला असून यात दिग्गज अभिनेते सचिन खेडेकर, अमेय वाघ, सिद्धार्थ चांदेकर, क्षिती जोग, कादंबरी कदम, हरीश दुधाडे, निर्मिती सावंत, पुष्कराज चिरपुटकर आणि प्राजक्ता कोळी अशी दमदार स्टारकास्ट आहे. चित्रपटाचे लेखन आणि दिग्दर्शन हेमंत ढोमे यांचे असून, क्षिती जोग निर्माती आहे. तर सहनिर्माते विराज गवस, उर्फी काझमी (क्रेझी फ्यू फिल्म्स) आणि अजिंक्य ढमाळ आहेत.