Sudha Reddy Met Gala 2026: फॅशन जगतातील मोठ्या सोहळ्यांपैकी एक 'मेट गाला' (Met Gala 2026) मध्ये यंदा हैदराबादमधील उद्योजिका सुधा रेड्डी यांचीच चर्चा आहे. मनिष मल्होत्राने डिझाइन केलेल्या आकर्षक ड्रेससोबतच त्यांच्या गळ्यातील कोट्यवधींच्या नेकलेसने जगभरातील फॅशन प्रेमींचे डोळे दिपवले आहेत.
142 कोटींचा 'क्वीन ऑफ मेरलानी' नेकलेस
सुधा रेड्डी यांनी या सोहळ्यासाठी त्यांच्या खाजगी संग्रहातील एक अतिशय दुर्मिळ नेकलेस परिधान केला होता. 'पीपल' मासिकाने दिलेल्या माहितीनुसार, या नेकलेसची किंमत तब्बल 15 दशलक्ष डॉलर्स (सुमारे 142.8 कोटी रुपये) इतकी आहे. या नेकलेसमध्ये व्हिक्टोरियन फिनिश साखळी असून त्याला नाशपाती आणि त्रिकोणी आकाराचे रोझ-कट हिरे लावण्यात आले आहेत.
नेकलेसचं वैशिष्ट्य
या दागिन्याचे मुख्य आकर्षण म्हणजे 550 कॅरेटचा गडद जांभळा-निळा 'टांझानीट' (Tanzanite) पेंडंट आहे. ज्याला 'क्वीन ऑफ मेरलानी' असे नाव देण्यात आले आहे. हा मौल्यवान खडा टांझानियातील मेरलानी टेकड्यांमधून मिळवण्यात आला आहे. याव्यतिरिक्त त्यांनी 30 कॅरेटची रोझ-कट पोलकी हिऱ्याची अंगठी आणि 40 कॅरेटचा कोलंबियन पाचू असलेली अंगठी देखील परिधान केली होती.
(नक्की वाचा- DMart VIDEO: डीमार्टमध्ये जात असाल तर सतर्क राहा! एक चूक महागात पडेल)
मनिष मल्होत्राचा 'ट्री ऑफ लाईफ' पोशाख
सुधा रेड्डी यांचा पोशाख प्रसिद्ध डिझाइनर मनिष मल्होत्राने डिझाईन केला होता. 'ट्री ऑफ लाईफ' (Tree of Life) या संकल्पनेवर आधारित असलेल्या या गाऊनमध्ये दक्षिण भारतीय संस्कृती आणि आधुनिक फॅशनचा मेळ घालण्यात आला होता. यामध्ये 3000 वर्षे जुन्या 'कलमकारी' परंपरेचा वापर करण्यात आला होता.
(नक्की वाचा- Dombivli News: खाऊ आणायला गेलेली आई आलीच नाही; 3 चिमुरड्यांचे रस्त्यावरच रडून-रडून हाल!)
वेलवेट, जुन्या सोन्याची जरी आणि जर्दोजी कामाचा वापर करून हा पोशाख तयार करण्यात आला. या कपड्यावर पालापिट्टा, जम्मी चेट्टू, कल्पवृक्ष, सूर्य आणि चंद्राची प्रतीके कोरण्यात आली होती, जी तेलंगणा आणि आंध्र प्रदेशच्या परंपरेचे प्रतिनिधित्व करतात. सुधा रेड्डी यांनी 2021 मध्ये पहिल्यांदा मेट गालामध्ये पदार्पण केले होते. यंदाचा त्यांचा हा लूक 'कॉस्च्युम आर्ट' या थिमला साजेसा आणि अविस्मरणीय ठरला आहे.
"हैदराबाद हे केवळ माझे मूळ नाही, तर ती माझी ओळख आहे. या लूकच्या माध्यमातून मला दक्षिण भारतीय कल्पकता जागतिक व्यासपीठावर मांडायची होती," असे सुधा रेड्डी यांनी आपल्या इंस्टाग्राम पोस्टमध्ये म्हटले आहे. हा पोशाख तयार करण्यासाठी हजारो तास आणि शेकडो कारागिरांचे हात लागले असल्याचेही त्यांनी नमूद केले.
Track Latest News Live on Marathi.NDTV.com and get news updates from India and around the world
