गुजरातची राजधानी अहमदाबाद येथे भीषण विमान अपघात झाला. अहमदाबादहून लंडनला जाणारे विमान उड्डाण केल्यानंतर काही मिनिटांतच दुर्घटनाग्रस्त झाले. अपघात होण्यापूर्वी विमानाच्या वैमानिकाने (पायलट) अपघाताचा संदेश देण्यासाठी 'मेडे कॉल' केला होता. पण काही क्षणातच विमान दुर्घटनाग्रस्त झाले. घटनास्थळावरून आग आणि धुराचे लोट उठताना दिसले. एअर इंडियाचे हे विमान अहमदाबादच्या मेघानीनगर आयजीपी परिसरात दुर्घटनाग्रस्त झाले. अपघाताच्या वेळी विमानात 12 केबिन क्रू सदस्यांसह 242 लोक होते.
('NDTV मराठी' चं अधिकृत व्हॉट्सअ‍ॅप चॅनल जॉईन करा )
8200 तासांचा उड्डाणाचा अनुभव
एअर इंडियाच्या विमानात असलेल्या 12 केबिन क्रू सदस्यांमध्ये कॅप्टन सुमित सभरवाल आणि फर्स्ट ऑफिसर क्लाइव्ह कुंदर यांचा समावेश होता. मिळालेल्या माहितीनुसार, विमानाचे संचालन कॅप्टन सुमित सभरवाल करत होते. त्यांच्यासोबत फर्स्ट ऑफिसर क्लाइव्ह कुंदर होते. कॅप्टन सुमित सभरवाल हे एलटीसी (Line Training Captain) असून त्यांना विमान उडवण्याचा तब्बल 8200 तासांचा उड्डाणाचा अनुभव होता. को-पायलटला (First Officer) 1100 तासांचा उड्डाणाचा अनुभव होता.
वैमानिकाकडून प्रतिसाद नाही
डीजीसीए (DGCA) ने एका निवेदनात सांगितले की, एटीसी (ATC) नुसार, विमानाने अहमदाबादमधून रनवे 23 वरून दुपारी दीडच्या सुमारास उड्डाण केले. त्यांनी एटीसीला अत्यंत तातडीचा कॉल ('मेडे कॉल') केला. परंतु त्यानंतर एटीसीने केलेल्या कॉलला वैमानिकाकडून कोणताही प्रतिसाद मिळाला नाही. डीजीसीएच्या माहितीनुसार, विमान रनवे 23 वरून उड्डाण केल्यानंतर लगेचच विमानतळाच्या बाहेर जमिनीवर कोसळले. त्यांनी सांगितले की, अपघातस्थळावरून मोठ्या प्रमाणात काळा धूर निघताना दिसला. बोईंग विमान वेगाने खाली येताना दिसले. ते विमानतळाजवळच्या मेघाणीनगर परिसरात दुर्घटनाग्रस्त झाले.
'मेडे कॉल' म्हणजे काय?
'मेडे कॉल' हे आंतरराष्ट्रीय स्तरावर एक आपत्कालीन संकेत आहे. याचा उपयोग हवाई आणि सागरी वाहतुकीदरम्यान केला जातो. आपत्कालीन परिस्थिती उद्भवल्यास तीन वेळा 'मेडे, मेडे, मेडे' असे म्हणून माहिती दिली जाते. जेणेकरून ती स्पष्टपणे समजू शकेल. हा शब्द फ्रेंच वाक्यांश "m'aider" (एम-एदेर) वरून आला आहे. ज्याचा अर्थ "मला मदत करा" असा होतो. हे पूर्वनिश्चित स्वरूप आहे. 'मेडे कॉल' एखाद्या विमान किंवा जहाजाला नियंत्रित करणाऱ्या व्यक्तीद्वारे केला जातो. साधारणपणे हा वैमानिक (पायलट) किंवा जहाजाचा कॅप्टन असतो. जेव्हा त्यांना गंभीर आपत्कालीन परिस्थितीचा सामना करावा लागतो, त्यावेळी हा कॉल केला जातो.
इंजिन निकामी होणे, आग लागणे, नियंत्रण सुटणे किंवा अशीच इतर कारणे असतात, त्यावेळी मेडे कॉल केला जातो. अशी परिस्थिती जी विमान किंवा जहाजात असलेल्या लोकांच्या सुरक्षिततेला धोक्यात आणतात त्यावेळी हे पाऊल उचलले जाते. विमानाचा वैमानिक रेडिओवर एअर ट्रॅफिक कंट्रोल (ATC) ला 'मेडे कॉल' करतो. जर मूळ कॉलरचा संपर्क तुटला, तर तो इतर जवळच्या विमान किंवा जहाजाद्वारे देखील पाठवला जाऊ शकतो.
Track Latest News Live on Marathi.NDTV.com and get news updates from India and around the world
