Milk Prices Hike: अमूल दूध महागले! नवे दर 14 मे पासून संपूर्ण देशात लागू, जाणून घ्या किती झाली दरवाढ

सध्या देशात महागाई पाहायला मिळत आहे. पेट्रोल, डिझेल आणि गॅसच्या तुटवड्याचा थेट परिणाम या महागाईवर झाला आहे. त्यात महागाईचा आणखी एक फटका सर्वसामान्यांच्या खिशाला बसला आहे. देशातील आघाडीची दुग्ध उत्पादक कंपनी 'अमूल'ने (GCMMF) दुधाच्या दरात वाढ केली आहे. अमूलने प्रति लिटर 2 रुपयांची वाढ करण्याची घोषणा केली आहे. ही दरवाढ उद्यापासून, म्हणजेच 14 मे पासून संपूर्ण देशभरात लागू होणार आहे. त्यामुळे सर्व सामान्यांच्या खिशाला आणखी कट लागणार आहे. सध्याच्या स्थितीत ही दोन रूपयांची वाढ ही सर्व सामान्यांसाठी न परवडणारीच म्हणावी लागेल.  

नक्की वाचा - Pocket AC: एसीची गरज नाही! गळ्यात घाला 'हे' खास डिव्हाइस, उन्हात मिळेल गारेगार अनुभव, पाहा किंमत

गुजरात को-ऑपरेटिव्ह मिल्क मार्केटिंग फेडरेशनने स्पष्ट केले आहे की, ही दरवाढ अमूलच्या सर्व प्रकारच्या दुधावर लागू असेल. यामध्ये अमूल गोल्ड, अमूल ताझा, अमूल शक्ती, टी-स्पेशल, स्लिम अँड ट्रिम आणि गाईच्या दुधाचा समावेश आहे. या निर्णयामुळे आता ग्राहकांना प्रत्येक लिटरमागे 2 रुपये जादा मोजावे लागतील. दूध उत्पादन आणि वितरणाच्या खर्चात झालेली वाढ लक्षात घेऊन हा निर्णय घेण्यात आल्याचे समजते. 

नक्की वाचा - Secret Tips: महिनाभर लिंबू ताजे ठेवण्याच्या भन्नाट 'सीक्रेट ट्रिक', 90 टक्के लोकांना माहितच नाही

गेल्या काही महिन्यांपासून पशुखाद्याच्या किमती आणि वाहतूक खर्च वाढल्याने डेअरी उद्योगावर ताण निर्माण झाला होता. या दरवाढीमुळे दूध उत्पादक शेतकऱ्यांनाही काही प्रमाणात दिलासा मिळण्याची शक्यता वर्तवण्यात येत आहे.उद्या, गुरुवारपासून जेव्हा तुम्ही अमूल दुधाची पिशवी खरेदी कराल, तेव्हा तुम्हाला वाढीव किमतीत ती खरेदी करावी लागेल. या दरवाढीचा परिणाम हॉटेल व्यवसाय आणि मिठाई उत्पादनांवरही होण्याची शक्यता आहे, ज्यामुळे आगामी काळात इतर पदार्थांच्या किमतीही वाढू शकतात.