Jeet Adani Weeding : अदाणी समुहाचे प्रमुख गौतम अदाणी (Gautam Adani) यांचे कनिष्ठ चिरंजीव जीत अदाणी (Jeet Adani) यांचे लग्न दिवा शाह (Diva Shah) यांच्याशी शुक्रवारी (7 फेब्रुवारी 2025) साधेपद्धतीनं पार पडलं. आपल्या मुलाचा विवाह परंपरागत पद्धतीने आणि अत्यंत साधेपणे केला जाईल असे गौतम अदाणी यांनी महाकुंभमेळ्यातील भेटीदरम्यान जाहीर केले होते. त्या शब्दाला जागून अदाणी यांनी या विवाहानिमित्त दहा हजार कोटी रुपये समाजाकरिता देण्याचे जाहीर केले.
जीत गौतम अदाणी याच्या विवाहानिमित्त गौतम अदाणी यांनी समाजसेवेसाठी जाहीर केलेली ही रक्कम वेगवेगळ्या समाजोपयोगी कामांसाठी वापरली जाईल. गौतम अदाणी हे जगातील प्रमुख श्रीमंत व्यक्तींमध्ये गणले जातात. सेवा साधना है, सेवा प्रार्थना है और सेवा ही परमात्मा है, या गौतम अदाणींच्या तत्वानुसार या निधीतून कशा प्रकारे समाजसेवा करावी हे ठरवण्यात आले आहे. आरोग्यसेवा, शिक्षण आणि कौशल्य विकास या क्षेत्रातील पायाभूत उपक्रमांसाठी या देणगीतील सर्वात जास्त रक्कम खर्च होईल.
या उपक्रमातून, समाजातील सर्व घटकांना परवडण्याजोग्या दरातील जागतिक दर्जाची रुग्णालये आणि वैद्यकीय महाविद्यालय, तसेच परवडणाऱ्या दरातील पण उच्च दर्जाच्या के ट्वेल्व्ह शाळा आणि कौशल्य विकास शिक्षण तसेच नोकरीची हमी देणाऱ्या जागतिक दर्जाच्या कौशल्य अकादमी स्थापन केल्या जातील.
मुलाच्या विवाह प्रसंगी गौतम अदाणी यांनी सोशल मीडिया नेटवर्क एक्स (पूर्वीचे नाव ट्विटर) ट्विट करत त्यांच्या भावना व्यक्त केल्या. अदाणी म्हणाले की, 'परमपिता परमेश्वराच्या आशीर्वादाने जीत आणि दिवा हे दोघे आज विवाहबद्ध झाले आहेत. हा विवाह आज नातलग आणि परिचित यांच्या उपस्थितीत पारंपारिक रीतीरिवाज आणि ज्येष्ठांच्या शुभ आशीर्वादात झाला. हा एक अत्यंत छोटा आणि वैयक्तिक घरगुती समारंभ होता. त्यामुळे इच्छा असूनही सर्व हितचिंतकांना या विवाहासाठी बोलवणे आम्हाला शक्य झाले नाही, त्यामुळे आम्हाला क्षमा करावी. पुत्री दिवा आणि जीत यांच्या विवाहानिमित्त आपण त्यांना शुभ आशीर्वाद द्यावेत हीच माझी इच्छा आहे.
परमपिता परमेश्वर के आशीर्वाद से जीत और दिवा आज विवाह के पवित्र बंधन में बंध गए।
— Gautam Adani (@gautam_adani) February 7, 2025
यह विवाह आज अहमदाबाद में प्रियजनों के बीच पारंपरिक रीति रिवाजों और शुभ मंगल भाव के साथ संपन्न हुआ।
यह एक छोटा और अत्यंत निजी समारोह था, इसलिए हम चाह कर भी सभी शुभचिंतकों को आमंत्रित नहीं कर सके,… pic.twitter.com/RKxpE5zUvs
या ट्वीटमध्ये गौतम अदाणी यांनी आपली सूनबाई दिवा हिचा उल्लेख मुलगी असा केला, हे उल्लेखनीय आहे असे दाखवून दिले जाते. अहमदाबाद मधील अदाणी शांतीग्राम वसाहती मधील बेलवेदर क्लब मध्ये शुक्रवारी दुपारी जीत आणि दिवा यांचा विवाह झाला. विख्यात हिरे व्यापारी जैमिन शहा याची दिवा ही कन्या आहे.
हा विवाह अत्यंत साधेपणे आणि नेहमीच्या परंपरागत धार्मिक रीतीरिवाजांनुसार आणि नंतर परंपरागत गुजराती पद्धतीनुसार झाला. त्याला फक्त जवळचे नातलग आणि मित्र अशा मोजक्या मंडळींची उपस्थिती होती. विशेष म्हणजे या विवाहास बडे राजकारणी, परदेशी मुत्सद्दी, उद्योजक, सनदी अधिकारी, चित्रपट तारे तारका, करमणूक करणारे व्यावसायिक आणि अन्य सेलिब्रिटींची अनुपस्थिती ठळकपणे जाणवत होती.
जीत अदाणी हे सध्या अदाणी एअरपोर्ट्सचे संचालक आहेत. या कंपनीतर्फे सहा आंतरराष्ट्रीय विमानतळांचे व्यवस्थापन केले जाते आणि नवी मुंबई येथील सातव्या विमानतळाच्या उभारणीचे कामही कंपनीतर्फे केले जात आहे.जीत यांनी युनिव्हर्सिटी ऑफ पेनसिलव्हेनियाज स्कूल ऑफ इंजीनियरिंग अ‍ॅप्लाईड सायन्स मधून त्यांचे उच्च शिक्षण पूर्ण केले आहे.
( नक्की वाचा : Jeet Adani : सामाजिक बांधिलकी जपत मनं जिंकली, जीत अदाणी यांनी केला 'मंगल सेवा' चा संकल्प )
या विवाहाच्या दोन दिवस आधी गौतम अदाणी यांनी यानिमित्त मंगल सेवा हा समाजसेवी उपक्रम जाहीर केला होता. याद्वारे 500 विवाहित दिव्यांग वधूंना प्रत्येकी दहा लाख रुपयांचे सहाय्य पुरवले जाणार आहे. दरवर्षी एवढेच सहाय्य दिले जाणार असून विवाहाच्या निमित्ताने जीत याने या उपक्रमाची सुरुवात करताना 21 नवविवाहित अपंग महिला आणि त्यांच्या पतींची भेट घेऊन त्यांना सहाय्य दिले.
जीत आणि दिवा यांनी विवाहानिमित्त समाजसेवी उपक्रमांनी आपल्या सहजीवनाची सुरुवात केली, याबद्दल गौतम अदाणी यांनी देखील ट्विटद्वारे समाधान व्यक्त केले होते. गौतम अदाणी प्रयागराज येथे महा कुंभमेळ्यात २१ जानेवारी रोजी सहभागी झाले होते. तेव्हा, त्यांचा मुलगा जीत याच्या विवाहानिमित्त देखील सेलिब्रिटींचा महा कुंभमेळा जमेल का ? असे त्यांना विचारल्यावर त्यांनी स्पष्ट शब्दात नकार दिला होता.
आम्ही सर्वसामान्य माणसांप्रमाणेच आहोत. जीत येथे फक्त गंगामातेचे आशीर्वाद घेण्यासाठी आला आहे. त्याचा विवाह परंपरागत पद्धतीने साधेपणानेच होईल, असेही ते ठामपणे म्हणाले होते. त्यानुसार हा विवाह साधेपणाने झाला. स्वतःपेक्षा सेवा मोठी या गौतम अदाणी यांच्या तत्त्वानुसार केलेली कृती म्हणजे, बड्या व्हीआयपी मंडळींचे विवाह कसे असावेत, याचे एक उदाहरणच असल्याचे बोलले जाते. समाजसेवेला पाठिंबा देण्याचा निर्णय घेऊन आपल्या आयुष्यातील महत्त्वाचे क्षणही कसे साजरे करावेत, याची व्याख्या अदाणी यांनी विचारपूर्वक बदलली असल्याचे दाखवून दिले जात आहे. संपत्तीचे प्रदर्शन करण्याऐवजी त्यांनी विचारपूर्वक समाजसेवेवर भर देऊन वेगळाच आदर्श निर्माण केल्याचे सांगितले जात आहे.
(अस्वीकार: नवी दिल्ली टेलिव्हिजन ही अदानी समुहाच्या AMG मीडिया नेटवर्क्स लिमिटेडची उपकंपनी आहे.)
Track Latest News Live on Marathi.NDTV.com and get news updates from India and around the world
