Raigad News : राडगडमध्ये पालकमंत्रिपदावरुन वाद, भरत गोगावले समर्थकांचा फुल राडा

मेहबूब जमादार, रायगड

महायुती सरकारने सत्ता स्थापन केल्यानंतर जवळपास दीड महिन्यांनंतर पालकमंत्र्यांची यादी जाहीर करण्यात आहे. रायगडचं पालकमंत्रिपद कुणाला मिळणार यावरुन राष्ट्रावादी काँग्रेस आणि शिवसेनेमध्ये आधीपासूनच रस्सीखेच सुरु होती. भरत गोगावले आणि अदिती तटकरे पालकमंत्रिपदासाठी इच्छुक होते. मात्र या लढाईत अदिती तटकरे यांनी बाजी मारली. यावरून भरत गोगावले समर्थक आक्रमक झाले आहेत. 

('NDTV मराठी' चं अधिकृत व्हॉट्सअ‍ॅप चॅनल जॉईन करा)

पालकमंत्रिपदांची यादी जाहीर झाल्यापासून रायगडच्या महाडमध्ये राडा सुरु झाला आहे. भरत गोगावले यांना डावलल्यावरून महाडमधील शिवसैनिक संतापले आहेत. रात्री उशिरा शिवसैनिकांनी मुंबई-गोवा महामार्गावर उतरुन महामार्ग रोखला. महाड तालुक्यातील नांगलवाडी हद्दीत मुंबई-गोवा महामार्गावर टायर जाळून शिवसैनिकांनी निदर्शने केली. 

(नक्की वाचा-  बीडचं पालकमंत्रिपद गमावताच धनंजय मुंडेंची पहिली प्रतिक्रिया, अजित पवारांचं नाव घेत म्हणाले...)

शिवसेनेच्या कार्यकर्त्यांनी भरत गोगावले यांचा जयजयकार करत राष्ट्रवादीचे प्रदेशाध्यक्ष खासदार सुनिल तटकरे यांच्या विरोधात जोरदार घोषणाबाजी केली. गोगावले यांना पालकमंत्री पद न मिळाल्याने नाराज शिवसैनिकांनी सुमारे दोन तास महामार्ग रोखून धरला. 

महाड MIDC, महाड शहर पोलिसांनी हस्तक्षेप करत संतप्त शिवसैनिकांना बाजूला करत वाहतूक सुरळीत केली. भरत गोगावले यांना पालकमंत्री पदावरून डावलल्या प्रकरणी दक्षिण रायगडमध्ये आज पुन्हा पडसाद उमटण्याची शक्यता वर्तवली जात आहे. 

( नक्की वाचा : मुंडेंना धक्का, तटकरेंना बळ... पालकमंत्र्यांच्या यादीतून मुख्यमंत्र्यांनी काय दिले महत्त्वाचे संदेश? )

पालकमंत्र्यांची यादी 

• गडचिरोली          देवेंद्र फडणवीस 
• ठाणे                   एकनाथ शिंदे 
• मुंबई शहर           एकनाथ शिंदे 
• पुणे                     अजित पवार 
• बीड                    अजित पवार 
• नागपूर                 चंद्रशेखर बावनकुळे 
• अमरावती             चंद्रशेखर बावनकुळे 
• अहिल्यानगर          राधाकृष्ण विखे पाटील 
• वाशिम                  हसन मुश्रीफ 
• सांगली                  चंद्रकांत  पाटील 
• नाशिक                 गिरीश महाजन 
• पालघर                  गणेश नाईक 
• जळगाव                 गुलाबराव पाटील 
• यवतमाळ               संजय राठोड 
• मुंबई उपनगर         आशिष शेलार, मंगलप्रभात लोढा 
• रत्नागिरी                 उदय सामंत 
• धुळे                       जयकुमार रावल 
• जालना                   पंकजा मुंडे 
• नांदेड                     अतूल सावे 
• चंद्रपूर                    अशोक उईके 
• सातारा          शंभूराज देसाई
• रायगड         आदिती तटकरे
• लातूर          शिवेंद्रसिंहराजे भोसले
• नंदूरबार        माणिकराव कोकाटे
• सोलापूर        जयकुमार गोरे
• हिंगोली        नरहरी झिरवाळ
• भंडारा        संजय सावकारे
• छत्रपती संभाजीनगर  संजय शिरसाट
• धाराशिव       प्रताप सरनाईक
• बुलडाणा       मकरंद जाधव (पाटील)
• सिंधुदुर्ग       नितेश राणे
• अकोला      आकाश फुंडकर
• गोंदिया      बाबासाहेब पाटील 
• कोल्हापूर     प्रकाश आबिटकर
• कोल्हापूर    माधुरी मिसाळ (सह-पालकमंत्री)
• गडचिरोली   आशिष जयस्वाल (सह -पालकमंत्री)
• वर्धा        पंकज भोयर
• परभणी     मेघना बोर्डीकर