Maharashtra Rain Weather Update: पावसाने गेल्या काही दिवसांपासून उसंत घेतली असली, तरी आता पुन्हा एकदा त्याने महाराष्ट्रात जोरदार कमबॅकची तयारी केली आहे. भारतीय हवामान विभागाने (IMD) दिलेल्या माहितीनुसार, कोकण आणि मध्य महाराष्ट्रातील घाट क्षेत्रांमध्ये पुन्हा एकदा जोरदार पाऊस सुरू होण्याची शक्यता आहे. बंगालच्या उपसागरात एक नवीन कमी दाबाचे क्षेत्र तयार झाले आहे, ज्यामुळे मान्सून पुन्हा सक्रिय होणार असून, त्याचा परिणाम महाराष्ट्रावर होणार आहे.
येत्या काही दिवसांत म्हणजे 26 ऑगस्टपासून पावसाचा जोर वाढेल, असा अंदाज हवामान विभागाने वर्तवला आहे. त्यामुळे नागरिकांनी आणि प्रशासनानेही विशेष काळजी घेण्याची गरज आहे. विशेषतः कोकण आणि मध्य महाराष्ट्रातील घाट क्षेत्रांमध्ये 26 ते 28 ऑगस्टदरम्यान अतिवृष्टीची शक्यता वर्तवण्यात आली आहे. हवामान विभागाने या भागांसाठी 'यलो अलर्ट' जारी केला आहे.
Climate Research & Services, IMD Pune@ClimateImd pic.twitter.com/CvCIM1rAVf
— Climate Research & Services, IMD Pune (@ClimateImd) August 23, 2025
गेल्या आठवड्यात झालेल्या अतिवृष्टीमुळे राज्यातील अनेक भागांत पूरसदृश स्थिती निर्माण झाली होती, त्यामुळे जीवित आणि मालमत्तेचे मोठे नुकसान झाले. आता येणारा पाऊस त्यापेक्षा कमी तीव्रतेचा असला, तरी सध्याच्या संतृप्त जमिनीमुळे आणि नद्यांतील वाढलेल्या पाणीपातळीमुळे परिस्थिती गंभीर होण्याची शक्यता आहे.
हवामान विभागाच्या माहितीनुसार, बंगालच्या उपसागरातून निर्माण झालेले हे कमी दाबाचे क्षेत्र हळूहळू पश्चिम दिशेने सरकणार आहे. त्यामुळे पश्चिम वाऱ्यांचा जोर वाढणार असून, त्याचा थेट परिणाम कोकण किनारपट्टी आणि मध्य महाराष्ट्रातील घाटमाथ्यावर होणार आहे. खासगी हवामान संस्था 'स्कायमेट वेदर'नेही हवामान विभागाच्या अंदाजाला दुजोरा दिला आहे. स्कायमेटने वर्तवलेल्या अंदाजानुसार, कमी दाबाचे क्षेत्र बंगालच्या उपसागरातून पश्चिमेकडे सरकत असून, यामुळे मान्सूनच्या वाऱ्यांचा वेग वाढणार आहे.
याचा थेट परिणाम म्हणून कोकण किनारपट्टीला मोठा फटका बसण्याची शक्यता आहे. यामुळेच मुंबईसह कोकण किनारपट्टी भागात 25 ते 28 ऑगस्ट दरम्यान पुन्हा एकदा जोरदार पावसाची शक्यता आहे. रायगड, रत्नागिरी, पुणे, सातारा, कोल्हापूर आणि नाशिक या जिल्ह्यांच्या घाटमाथ्यांवर मुसळधार पावसाचा अंदाज आहे.
नर्सच्या धाडसाला सलाम! ड्यूटीसाठी जीवघेणी नदी केली पार, अंगावर काटा आणणारा Video
Track Latest News Live on Marathi.NDTV.com and get news updates from India and around the world
