मुंबई: मुंबई महानगर प्रदेश विकास प्राधिकरणाने (MMRDA) हाती घेतलेल्या स्वामी समर्थ नगर ते विक्रोळी या मेट्रो ६ मार्गिकेच्या (Metro Line 6) कामात नियोजनशून्यतेमुळे (Lack of Planning) मोठा गोंधळ निर्माण झाला आहे. कारशेडच्या संरेखनावरून (Alignment) झालेल्या अचानक बदलांमुळे, कांजुरमार्ग (Kanjurmarg) परिसरात उभारण्यात आलेले काही मेट्रोचे खांब पाडण्याची नामुष्की आता एमएमआरडीएवर ओढवली आहे. यामुळे कोट्यवधी रुपयांचा सार्वजनिक निधी (Public Funds) वाया गेल्याचे स्पष्ट झाले आहे.
केलेला खर्च गेला वाया!
मेट्रो ६ मार्गिकेच्या संरेखनात (Alignment) बदल करण्याचा निर्णय अचानक घेण्यात आला. या बदलामुळे, यापूर्वी बांधण्यात आलेल्या खांबांच्या उभारणीसाठी केलेला संपूर्ण खर्च पाण्यात गेला आहे. पूर्व आणि पश्चिम उपनगरांना जोडणाऱ्या या महत्त्वाच्या मार्गाच्या कामातील या ढिसाळपणामुळे प्रकल्पाच्या वेळेवर परिणाम होण्याची भीती व्यक्त होत आहे.
प्रकल्पाची स्थिती काय?
१५.३१ किलोमीटर लांबीच्या आणि १३ मेट्रो स्थानकांचा समावेश असलेल्या या मार्गिकेची उभारणी एमएमआरडीए करत आहे. ही मार्गिका मार्च २०२७ मध्ये वाहतुकीसाठी खुली करण्याचे नियोजन आहे. सध्या या मार्गिकेचे ९० टक्के बांधकाम (सिव्हिल वर्क) पूर्ण झाले आहे आणि अंतिम टप्प्यातील उर्वरित १० टक्के काम सुरू आहे. मात्र, याच प्रकल्पातील कारशेडचा प्रश्न अद्यापही मार्गी लागलेला नाही. कारशेडसाठीच्या जागेचा वाद अजूनही सुटलेला नसतानाच, आता मार्गिकेच्या संरेखनात बदल केल्यामुळे झालेला हा खर्च पाहता, एमएमआरडीएच्या कार्यक्षमतेवर प्रश्नचिन्ह उभे राहिले आहे. कारशेडच्या कामाचे कंत्राट अंतिम होऊनही हे काम मार्गी लागलेले नाही.
दरम्यान, या संपूर्ण प्रकरणातून एमएमआरडीएने कारशेडच्या जागेचा प्रश्न मार्गी लागण्यापूर्वीच घाईघाईने खांब उभारणीचे काम का सुरू केले, असा प्रश्न नागरिक विचारत आहेत. या अनावश्यक खर्चामुळे सरकारी तिजोरीवर पडलेला ताण आणि सार्वजनिक बांधकाम प्रकल्पांमधील जबाबदारीची (Accountability) कमतरता याकडे लक्ष वेधले जात आहे.
Track Latest News Live on Marathi.NDTV.com and get news updates from India and around the world
