साजय ढाबे, नांदेड
Nanded News : महाराष्ट्रातील नांदेड जिल्ह्यात झालेल्या मुसळधार पावसामुळे निर्माण झालेल्या पूरस्थितीला तोंड देण्यासाठी भारतीय लष्कराची मदत घेण्यात येत आहे. सततच्या पावसामुळे जिल्ह्यातील चार गावे पाण्याखाली गेली आहेत. येथील लोकांना सुरक्षित ठिकाणी हलवण्यासाठी लष्कराचे जवान, राज्य आपत्कालीन प्रतिसाद दल (SDRF) आणि स्थानिक प्रशासनाकडून संयुक्तपणे मदत आणि बचाव कार्य सुरू आहे.
भारतीय लष्कराच्या 'सुदर्शन चक्र कोर' मधील 65 जवान, ज्यात अभियांत्रिकी कार्यदल आणि वैद्यकीय पथकांचा समावेश आहे, बचावकार्यासाठी घटनास्थळी दाखल झाले आहेत. यासोबतच, एसडीआरएफ आणि स्थानिक प्रशासनाचे कर्मचारीही मदत कार्यात सहभागी आहेत. सुमारे 200 हून अधिक लोक या पुरात अडकल्याची माहिती होती, ज्यांना बाहेर काढण्याचे प्रयत्न सुरू आहेत.
(नक्की वाचा- Mumbai Local Train Update: पावसामुळे मुंबईची लाईफलाईन विस्कळीत! तिन्ही मार्गावरील लोकल उशिरा, वाचा सविस्तर)
या पूरस्थितीला उदगीर (लातूर जिल्हा) येथील लेंडी धरणातून मोठ्या प्रमाणात पाण्याचा विसर्ग झाल्यामुळे अधिक गंभीर स्वरूप आले आहे. त्यामुळे लेंडी नदीला पूर आला असून, रावण, भासवाडी, हसनाळ पीएमयू आणि भिंगोली या चार गावांमध्ये पाणी शिरले आहे. या भागातून आतापर्यंत 300 हून अधिक ग्रामस्थांना बाहेर काढण्यात आले आहे. मात्र, अजूनही 9 लोक बेपत्ता असून, त्यांचा शोध घेण्यासाठी बचाव कार्य वेगाने सुरू आहे.
त्याचबरोबर, इसापूर धरणातून पाणी सोडल्यामुळे पैनगंगा नदीच्या पाण्याची पातळीही धोक्याच्या पातळीवरून वाहत आहे. त्यामुळे किनवट, गोकुंदा आणि बोधडी खुर्द या गावांमध्येही पूर आला आहे. किनवट शहरात नदीकाठच्या गोठ्यांमध्ये पाणी शिरल्याने सुमारे 25 जनावरे वाहून गेली आहेत, त्यापैकी अनेक जनावरांचा मृत्यू झाला आहे.
(नक्की वाचा- Pune Rains: पुण्यात पावसाचा जोर वाढला, अनेक सखल भागात पाणी साचायल सुरुवात)
हवामान विभागाने (IMD) नांदेड जिल्ह्यासाठी यलो अलर्ट जारी केला असून, मंगळवारीही मुसळधार पावसाचा अंदाज वर्तवला आहे. पूरस्थिती आणखी बिघडण्याची शक्यता लक्षात घेता, प्रशासनाने तातडीने लष्कराची मदत मागितली. भारतीय लष्कराने अधिकृत निवेदनात म्हटले आहे की, "राज्य प्रशासनाला मदत करण्यासाठी आणि शक्य तितक्या लवकर जनजीवन पूर्वपदावर आणण्यासाठी भारतीय लष्कर पूर्णपणे कटिबद्ध आहे." सध्या, सततचा पाऊस आणि नद्यांची वाढलेली पातळी पाहता, प्रशासनाने परिस्थितीवर बारकाईने लक्ष ठेवले आहे.
