Ajit Pawar Plane Crash New CCTV Video : महाराष्ट्राच्या राजकारणातील एक मोठी आणि अत्यंत दुर्दैवी घटना बुधवारी (28 जानेवारी 2026) घडली. बारामतीमध्ये बुधवारी सकाळी झालेल्या विमान अपघातात राज्याचे उपमुख्यमंत्री अजित पवार यांचे निधन झाले असून या भीषण घटनेचा एक नवीन सीसीटीव्ही व्हिडिओ आता समोर आला आहे.
या व्हिडिओमध्ये विमान हवेत आपले नियंत्रण गमावताना आणि त्यानंतर काही क्षणातच आगीच्या गोळ्यात रूपांतरित होताना स्पष्टपणे दिसत आहे. या दुर्घटनेत अजित पवार यांच्यासह विमानातील पाचही जणांचा जागीच मृत्यू झाला आहे. बारामतीमधील गोजुबावी ग्रामपंचायतीच्या सीसीटीव्ही कॅमेऱ्यात ही संपूर्ण थरारक घटना कैद झाली आहे.
काय आहे VIDEO?
समोर आलेल्या नवीन सीसीटीव्ही फुटेजमध्ये असे दिसते की, विमानाने जमिनीवर उतरण्यापूर्वीच हवेत आपले संतुलन गमावले होते. विमान हेलकावे खात पुढे जाताना दिसते आणि काही सेकंदातच झाडांच्या मागे ते कोसळते. कोसळल्यानंतर विमानाचा मोठा स्फोट होऊन त्याचे रूपांतर एका आगीच्या गोळ्यात झाल्याचे या व्हिडिओत दिसत आहे.
ही घटना अत्यंत वेगवान होती, ज्यामुळे विमानातील कोणालाही बाहेर पडण्याची संधी मिळाली नाही. घटनास्थळी विमानाचे अवशेष विखुरलेले असून सर्वत्र आगीचे लोट पाहायला मिळाले.
( नक्की वाचा : Ajit Pawar Death : अजितदादांचे पार्थिव पुन्हा हॉस्पिटलमध्ये हलवले; सुप्रिया सुळेंनी हात जोडून केलं हे आवाहन )
खराब हवामान आणि एटीसीशी तुटलेला संपर्क
या अपघाताबाबत बारामती विमान वाहतूक नियंत्रण कक्षाकडून (एटीसी) महत्त्वाची माहिती समोर आली आहे. बुधवारी सकाळी धुक्यामुळे दृश्यमानता कमी होती. विमानाचा पहिला संपर्क सकाळी 8 वाजून 18 मिनिटांनी झाला होता. जेव्हा विमान बारामतीपासून 30 नॉटिकल मैल दूर होते, तेव्हा वैमानिकाला हवामानाची स्थिती पाहून उतरण्याचा सल्ला दिला गेला होता. वैमानिकाने वारे आणि दृश्यमानतेबाबत विचारणा केली असता, त्यांना वारे शांत असून दृश्यमानता सुमारे 3,000 मीटर असल्याचे सांगण्यात आले होते.
रनवे दिसत नसल्याने घेतला होता हवेत फेरा
विमान जेव्हा रनवे 11 च्या जवळ आले, तेव्हा वैमानिकाने कळवले की त्यांना रनवे स्पष्ट दिसत नाहीये. त्यामुळे विमानाने हवेतच एक फेरा मारण्याचा निर्णय घेतला. काही वेळानंतर वैमानिकाने पुन्हा संपर्क साधून रनवे दिसत असल्याचे एटीसीला कळवले.
त्यानुसार सकाळी 8 वाजून 43 मिनिटांनी एटीसीने विमान उतरवण्यासाठी हिरवा कंदिल दाखवला आणि धावपट्टी 11 वर लँडिंगची परवानगी दिली. मात्र, या परवानगीला वैमानिकाकडून कोणताही प्रतिसाद किंवा 'रीड-बैक' मिळाला नाही.
( नक्की वाचा : Ajit Pawar Net Worth: अजित पवारांचे अपघाती निधन, किती श्रीमंत होते उपमुख्यमंत्री? पाहा संपत्तीचा सर्व तपशील )
सकाळी 8 वाजून 44 मिनिटांनी सर्व काही संपले
एटीसीने लँडिंगची परवानगी दिल्यानंतर केवळ एका मिनिटात म्हणजेच सकाळी 8 वाजून 44 मिनिटांनी धावपट्टीच्या बाजूला आगीच्या ज्वाळा उठताना दिसल्या. परवानगी मिळाल्यानंतर विमानाचा संपर्क पूर्णपणे तुटला होता आणि अवघ्या काही सेकंदातच हे विमान धावपट्टीच्या कडेला कोसळून दुर्घटनाग्रस्त झाले. या भीषण आगीत विमानाचा पूर्णपणे कोळसा झाला असून महाराष्ट्राने आपला एक मोठा नेता गमावला आहे. या घटनेमुळे संपूर्ण राज्यावर शोककळा पसरली आहे.
इथे पाहा संपूर्ण व्हिडिओ
🔴#BREAKING | महाराष्ट्र विमान हादसा: अजित पवार के प्लेन क्रैश से ठीक पहले का वीडियो आया सामने #AjitPawarPlaneCrash | #Baramati | #Video | @ashutoshjourno | @vikasbha
— NDTV India (@ndtvindia) January 28, 2026
देखें LIVE: https://t.co/VeTAtQYmAA pic.twitter.com/wzeG0F3FwC
Track Latest News Live on Marathi.NDTV.com and get news updates from India and around the world
