भाजपच्या वर्तुळात प्रसिद्ध असणारे मात्र महाराष्ट्राला फारसे परिचित नसलेले एक नाव काल परवा अचानक हेडलाईन्समध्ये आणि बातम्यांमध्ये झळकायला लागले. पत्रकार आणि युट्युबर भाऊ तोरसेकर यांनी एक व्हिडीओ त्यांच्या युट्युब चॅनेलवरून प्रसिद्ध केला. या व्हिडीओमुळे श्वेता शालिनी नाव अचानक प्रकाशझोतात आले. कर्नाटकची अभिनेत्री आणि एकेकाळी काँग्रेसच्या सोशल मीडियाची धुरा वाहणाऱ्या अभिनेत्री रम्या उर्फ दिव्या स्पंदना हिच्याशी श्वेता शालिनी यांची तुलना करून त्यांच्यावर टीका करण्यात आली. या टीकेनंतर संतापलेल्या श्वेता शालिनी यांनी भाऊ तोरसेकरांविरोधात अब्रुनुकसानीचा दावा ठोकण्याची घोषणा केली होती.
भाऊ तोरसेकर हे भाजपच्या बाजूने आपली मते सातत्याने मांडत असतात. त्यांनी श्वेता शालिनी यांच्यावर केलेल्या टीकेमुळे महाराष्ट्र भाजपमध्ये अस्वस्थता निर्माण झाली होती. शालिनी यांनी तोरसेकरांविरोधात अब्रुनुकसानीचा दावा टोकण्याची भाषा केल्याचे कळताच भाजपमध्ये याबाबत चर्चेला सुरुवात झाली होती. राज्याचे उपमुख्यमंत्री देवेंद्र फडणवीस यांनी स्वत:या प्रकारामध्ये लक्ष घातले असे सांगितले जाते. वरिष्ठांनी श्वेता शालिनी यांना कडक शब्दात समज दिल्यानंतर शालिनी नरमल्या आणि त्यांनी भाऊ तोरसेकरांना पाठवलेली नोटीस आपण मागे घेत असल्याचे सांगितले. महाराष्ट्र भाजपच्या सोशल मीडिया आणि आयटी विभागाच्या प्रभारी असलेल्या श्वेता शालिनी यांनी X वर पोस्ट करत म्हटले की,
भाऊ तोरसेकरांनी काय म्हटले होते?
भाऊ तोरसेकर यांनी त्यांच्या युट्युब चॅनेल प्रतिपक्षवर प्रसिद्ध केलेल्या व्हिडीओमध्ये म्हटले आहे की, "मी एका अजब व्यक्तीचे नाव ऐकले ते म्हणजे श्वेता शालिनी,त्या आयटी सेलच्या प्रमुख आहेत असं मी ऐकलं आहे. निकालापर्यंत भाजपच्या आयटी सेलचा प्रमुख कोण आहे हे मला अजिबात माहिती नव्हतं. लोकसभा निवडणुकीसाठी प्रचार कसा करायचा, कोणाला कशी मदत करायची, कोणाला काय आर्थिक किंमत द्यायची याचे अधिकार श्वेता शालिनींकडे होते आणि त्यांनीच सगळा गोंधळ घातला अशा शेकडो कार्यकर्त्यांनी तक्रारी केल्या. भाजपला टारगेट करणारे यु्ट्युब चॅनेल, वाहिन्या, पत्रकारांना पॅकेजेस कशी दिली गेली? भाजपच्या प्रचारासाठीचा खर्च भाजपच्या अस्सल टीकाकारांकडे पोहोचवला गेला. त्यांच्याकडून एक जाहिरातवजा काहीतरी लिहून घेतलं गेलं. पण बाकी ते नियमित व्रतस्थ असल्यासारखे भाजपला झोडपत असतात. भाजपला मदतनीस ठरणाऱ्या अनेक पत्रकारांना वंचित ठेवण्यात आलं.
Photo Credit: Facebook.com/gbhautorsekar
कोण आहेत श्वेता शालिनी?
कालपर्यंत महाराष्ट्राला फारसे माहिती नसलेले नाव भाऊ तोरसेकरांनी केलेल्या व्हिडीओमुळे प्रकाशझोतात आले. अनेकांना प्रश्न पडला की या श्वेता शालिनी आहेत तरी कोण? श्वेता शालिनी यांच्या X अकाऊंटवर त्यांची माहिती तपासली असता त्यांनी स्वत:ची ओळख भाजप प्रवक्त्या, सोशल मीडिया आणि आयटी विभागाच्या राज्य प्रभारी, महाराष्ट्र मीडिया प्रभारी-तेलंगाणा, धोरणी उद्योजिका, वक्त्या आणि स्तंभ लेखिका अशी करून दिली आहे.
आमच्या प्रतिनिधींनी दिलेल्या माहितीनुसार श्वेता शालिनी या मूळच्या बिहारच्या असून त्यांचे वडील सैन्यात होते. पुण्यातून अभियांत्रिकीचे शिक्षण घेत असताना त्यांनी एमबीएची पदवी मिळवली होती. काही काळ खासगी कंपन्यांमध्ये काम केल्यानंतर त्यांनी स्वत:ची आयटी कंपनी स्थापन केली होती. महाराष्ट्र व्हिलेज सोशल ट्रान्सफॉर्मेशन फाऊंडेशनच्या कार्यकारी संचालक म्हणून त्यांनी काम पाहिलेले आहे. निती आयोगाच्या त्या सल्लागार आहे.2011 साली श्वेता शालिनी भाजपच्या संपर्कात आल्या. 2014 साली श्वेता शालिनी भाजपच्या राज्याच्या सोशल मीडिया टीममध्ये त्या दाखल झाल्या होत्या.
Photo Credit: Facebook.com/shweta.shalini2
दिव्या स्पंदना कोण आहेत?
कन्नड अभिनेत्री दिव्या स्पंदनाचे चित्रपटासाठी धारण केलेले नाव 'रम्या' आहे. अभिनय क्षेत्रात हात आमजावल्यानंतर दिव्या स्पंदना हिने राजकारणाकडे आपला मोर्चा वळवला होता. मंड्या लोकसभा मतदारसंघातून तिने पोटनिवडणूक जिंकली होती. दिव्या स्पंदनाकडे 2019 च्या लोकसभा निवडणुकीपूर्वी काँग्रेसच्या सोशल मीडियाची सूत्रे सोपवण्यात आली होती.
Photo Credit: facebook.com/ramyaactressofficial
दिव्या स्पंदना हिने काँग्रेस नेते राहुल गांधी यांची मर्जी संपादन केली होती ज्यामुळे ती मनमानीपणे आपला कारभार करत होती असा आरोप केला जातो. निवडणुकीतील पराभवानंतर दिव्या स्पंदनावर जबरदस्त टीका झाली होती. दिव्या स्पंदना हिने 8 कोटी रुपयांचा घोटाळा केल्याचा आरोपही केला गेला. हे सगळे आरोप आपली बदनामी करण्यासाठी केले जात असल्याचा आरोप दिव्याने केला होता.
