Shirdi News : "प्रसाद नव्हे तर... शिर्डीच्या मोफत भोजन व्यवस्थेवर सुजय विखे यांचा थेट हल्ला, वाद पेटणार?

सुनील दवंगे, प्रतिनिधी

Shirdi News :  शिर्डी येथील साईबाबा प्रसादालयात भाविकांना देण्यात येणारे अन्न हे प्रसाद नसून जेवण असल्याचा खळबळजनक आणि वादग्रस्त दावा भारतीय जनता पक्षाचे (भाजप) माजी खासदार सुजय विखे यांनी पुन्हा एकदा केला आहे. नगरपरिषद निवडणुकीच्या निमित्ताने आयोजित एका कॉर्नर सभेत शहराच्या वाढत्या गुन्हेगारीवर भाष्य करताना त्यांनी पुन्हा एकदा साईप्रसादालयातील मोफत भोजनाचा विषय काढून हे वक्तव्य केले.

प्रसाद म्हणजे काय?

काही दिवसांपूर्वी केलेल्या अशाच एका विधानामुळे सुजय विखे चांगलेच चर्चेत आले होते आणि वादाच्या भोवऱ्यात सापडले होते. आता पुन्हा त्याच वक्तव्याची आठवण करून देत, त्यांनी आपल्या दाव्याचे समर्थन केले आहे. त्यांच्या मते, प्रसाद हा केवळ घुगऱ्या आणि लापशीचा असू शकतो.

शिर्डीच्या साईप्रसादालयात भाविकांना मिळणाऱ्या अन्नात भाजी, पोळी, वरण आणि भात असे संपूर्ण भोजन मिळत असल्यामुळे, ते प्रसाद नसून जेवण आहे, असे स्पष्ट मत त्यांनी व्यक्त केले. शिर्डी संस्थानाकडून भाविकांसाठी चालवल्या जाणाऱ्या एका मोठ्या सेवेला त्यांनी थेट आव्हान दिल्याने हा विषय पुन्हा एकदा ऐरणीवर आला आहे.

( नक्की वाचा : Local Body Elections: झेडपी-मनपा आरक्षण पुन्हा! निवडणूक आयोग घेणार मोठा निर्णय, वाचा सविस्तर )

'भिकारी आणि गुन्हेगार....' 

आपल्या विधानाला आणखी धार देत सुजय विखे यांनी साईभक्तांच्या उपस्थितीबद्दलही गंभीर दावा केला. त्यांच्या म्हणण्यानुसार, पूर्वी शिर्डीत फिरणारे लोक हे खरे साईभक्त नव्हते, तर ते भिकारी आणि गुन्हेगार होते.

ते लोक फक्त जेवायचे, त्यानंतर 500 रुपये भाड्याच्या खोलीत झोपायचे आणि सकाळी पुन्हा आपल्या 'कामावर' जायचे. त्यांनी आवाज उठवल्यामुळे आणि योग्य पाऊले उचलल्यामुळे ही पद्धत बंद झाली, असा दावाही त्यांनी यावेळी केला आहे.

शिर्डीतील हॉटेल व्यवसाय आणि इतर स्थानिक उद्योगांना चालना मिळावी यासाठी भाविक येथे आले पाहिजेत आणि त्यांनी मुक्काम केला पाहिजे, यावर त्यांनी भर दिला. स्थानिक व्यवसाय व्यवस्थित चालावेत, या हेतूनेच 'ब्रेक दर्शन' सेवा सुरू करण्यात आल्याचेही सुजय विखे यांनी यावेळी स्पष्ट केले आहे.