Mumbai News : गुजरात पोलिसांतील एक फरार आणि कुख्यात तस्कराने मुंबईत अत्यंत साधारण ठिकाणाहून कोटींचं रॅकेट उभं केल्याचा धक्कादायक प्रकार समोर आला आहे. मुंबई पोलिसांनी या हाय-प्रोफाइल नेटवर्कचा भांडाफोड करीत आरोपी आणि त्याच्या पत्नीला एका साथीदारासोबत अटक केली आहे.
पोलिसांनी दिलेल्या माहितीनुसार, मुख्य आरोपी मोहम्मद आरिफ मोहम्मद इलियास शेख यापूर्वीच गुजरातमध्ये ड्रग्स तस्करी प्रकरणात दोषी आहे. २०२३ मध्ये पॅरोलवर तुरुंगातून बाहेर आल्यानंतर तो फरार झाला होता. तो सूरतच्या लाजपोर तुरुंगात शिक्षा भोगत असताना गुजरात पोलीस त्याच्या शोधात होते.
अंधेरीच्या चाळीतून सुरू होता ड्रग्सचा व्यवसाय...
फरार झाल्यानंतर आरिफ मुंबईला आला. येथे सांताक्रूज पूर्वेत पत्नी नसरीनसोबत राहू लागला. पोलिसांपासून स्वत:चा बचाव करण्यासाठी त्याने राहण्यासाठी आणि बेकायदेशीर कामांसाठी वेगवेगळ्या जागा निवडल्या. अंधेरीतील सहार रोड स्थित एका चाळीत त्याने अवघ्या १३ हजार रुपयात घर भाड्याने घेतलं. या घरात तो गुप्तपणे एमडी ड्रग्स तयार करीत होता. तपासानुसार, या लहान खोलीत तो दर महिना तब्बल २५ ते ३० कोटींचा ड्रग्स तयार करीत नेटवर्कच्या माध्यमातून बाजारात सप्लाय करीत होता. कुणाला संशय येऊ नये म्हणून आरोपी आपल्या भागात ड्रग्सचा सप्लाय करीत नव्हता.
खार पोलीस गश्तीवर असताना संशयास्पद व्यक्तीला पकडण्यात आलं. तपासादरम्यान त्याच्याजवळ १५.४४ ग्रॅम एमडी ड्रग्स सापडले. चौकशीदरम्यान त्याने आपली ओळख आणि संपूर्ण नेटवर्कचा खुलासा केला. यानंतर पोलिसांनी अंधेरीस्थित खोलीत छापेमारी करीत ड्रग्स तयार करण्याचे उपकरण आणि केमिकल्स ताब्यात घेतले.
छाप्यापूर्वी रिजवानने पुरावे हटविण्याचा केला प्रयत्न...
पोलिसांना संशय आहे की, आरोपीसह रिजवान अहमदने छाप्यापूर्वी काही पुरावे हटविण्याचा प्रयत्न केला होता. यानंतर त्याला उत्तर प्रदेशातील प्रतापगढमधून अटक करण्यात आली. आरोपीची पत्नी नसरीन या अवैध धंद्याचा आर्थिक कारभार सांभाळत होती. त्याच्या बँक खात्यातून 26 लाख रुपये गोठवण्यात आले असून ही कमाई ड्रग्ज असल्याचं मानलं जात आहे.
Track Latest News Live on Marathi.NDTV.com and get news updates from India and around the world
