मुंबईत सध्या सुरू असलेल्या पावसाच्या पार्श्वभूमीवर सोशल मीडिया प्लॅटफॉर्मवर एक अत्यंत दिशाभूल करणारी बातमी वेगाने पसरत आहे. "बुधवार, 8 जुलैरोजी मुंबईतील सर्व शाळा बंद राहतील आणि खाजगी क्षेत्रातील कार्यालयांना कर्मचाऱ्यांना घरातून काम करण्याची परवानगी देण्यात आली आहे," असा दावा या व्हायरल मेसेजमध्ये केला जात आहे. या मेसेजमुळे पालक, विद्यार्थी आणि नोकरदार वर्गामध्ये कमालीचा गोंधळ निर्माण झाला आहे.
या वाढत्या अफवांची गंभीर दखल घेत मुंबई महानगरपालिका (BMC) प्रशासनाने तातडीने पुढे येत अधिकृत स्पष्टीकरण जारी केले आहे आणि हा व्हायरल मेसेज पूर्णपणे बनावट असल्याचे स्पष्ट केले आहे.
कोणतीही सुट्टी जाहीर केलेली नाही, बीएमसीचं स्पष्टीकरण
मुंबई महानगरपालिकेने नागरिकांना आवाहन केले आहे की, सोशल मीडियावर फिरणारा हा संदेश पूर्णपणे खोटा आहे. महानगरपालिका प्रशासनाने शाळा बंद ठेवण्याबाबत किंवा खाजगी कंपन्यांना वर्क फ्रॉम होम देण्याबाबत कोणताही अधिकृत आदेश किंवा अधिसूचना जारी केलेली नाही. त्यामुळे उद्या सर्व शाळा आणि कार्यालये नेहमीप्रमाणे पूर्ववत सुरू राहतील. नागरिकांनी अशा कोणत्याही अफवांवर विश्वास ठेवून संभ्रमात पडू नये.
❌मुंबईतील शाळा उद्या म्हणजेच बुधवार, दिनांक ८ जुलै २०२६ रोजी बंद असतील. तसेच, खासगी क्षेत्रातील कार्यालयांना घरून काम करण्याची परवानगी देण्यात आली आहे, अशा आशयाचा संदेश समाजमाध्यमांतून प्रसारित होत आहे.
— माझी Mumbai, आपली BMC (@mybmc) July 7, 2026
🔹बृहन्मुंबई महानगरपालिकेद्वारे याबाबत स्पष्ट करण्यात येत आहे की, हा संदेश… pic.twitter.com/ZdgG6qxmts
अफवांपासून सावधान
पावसाळ्याच्या दिवसांत सोशल मीडियाचा गैरवापर करून अशा प्रकारे पालकांमध्ये आणि नागरिकांमध्ये भीती किंवा संभ्रम पसरवण्याचे प्रकार वाढतात. यामुळे पालिका प्रशासनाने मुंबईकरांना सतर्क राहण्याचा इशारा दिला आहे. कोणत्याही बातमीची शहानिशा करण्यासाठी केवळ मुंबई महानगरपालिकेच्या अधिकृत सोशल मीडिया अकाउंटला म्हणजेच 'MyBMC' ला फॉलो करावे.
हेल्पलाईन नंबर
जर तुम्हाला शाळा किंवा पावसाळ्याशी संबंधित कोणतीही अधिकृत माहिती हवी असेल, तर पालिकेच्या 1916 या आपत्कालीन हेल्पलाईन नंबरवर थेट संपर्क साधून खात्री करून घ्यावी, असे आवाहन पालिकेने केले आहे.
Track Latest News Live on Marathi.NDTV.com and get news updates from India and around the world
