Pimpri Chinchwad: गुगल मॅपच्या मदतीने घरफोडी, पोलिसांचाही स्मार्ट तपास; दोघांना अटक

सूरज कसबे, पिंपरी चिंचवड

Pimpri Chinchwad :  तंत्रज्ञानाच्या या आधुनिक युगात चोरटेही आता 'स्मार्ट' झाले आहेत. चोरीसाठी चक्क 'गुगल मॅप'चा अत्यंत खुबीने आणि चलाखीने वापर केल्याचा प्रकार पिंपरी-चिंचवड शहरात उघड झाला आहे. मात्र, पिंपरी-चिंचवड गुन्हे शाखा युनिट पाचच्या पोलिसांनी याहून अधिक 'स्मार्ट' आणि अत्यंत बारकाईने तपास करत राजस्थानमधील या दोन सराईत चोरट्यांना जेरबंद केले आहे. पोलिसांनी केवळ एका तांत्रिक माहितीच्या आधारे आणि 100 ते 120 सीसीटीव्ही कॅमेऱ्यांची कसून तपासणी करून या गुन्हेगारांच्या मुसक्या आवळल्या आहेत.

आनंद सिंग पर्वत सिंग सरदार आणि गुरुदीप आनंद अशी या प्रकरणी अटक करण्यात आलेल्या आरोपींची नावे आहेत. या दोघांनी चोरी करण्यासाठी विशेष नियोजन केले होते. राजस्थान आणि मध्य प्रदेशातून खासगी बसने प्रवास करत त्यांनी पिंपरी-चिंचवड शहर गाठले. येथे आल्यानंतर त्यांनी स्थानिक पोलिसांच्या नजरेत न येण्यासाठी एक युक्ती लढवली. शहरातील एका हॉटेलमध्ये मुक्काम करण्यासाठी त्यांनी बनावट आधार कार्ड वापरून खोली आरक्षित केली होती. यामुळे त्यांची खरी ओळख लगेच उघड होऊ शकली नाही.

(नक्की वाचा- Chhatrapati Sambhajinagar: हॉटेलवर गाडी थांबताच नवरी फरार; शेतकरी नवऱ्याची लाखोंची फसवणूक)

गुगल मॅपचा 'चोरी'साठी वापर

या आरोपींनी चोरी करण्यासाठी जी नवी पद्धत वापरली, ती पोलिसांसाठी देखील आश्चर्यचकित करणारी होती. ते चोरीसाठी अत्याधुनिक तंत्रज्ञान वापरत होते. सर्वप्रथम हे चोरटे गुगल मॅपच्या मदतीने शहरांमधील उच्चभ्रू आणि सुरक्षित सोसायट्या शोधायचे. या सोसायट्यांमध्ये घरफोडी करणे सोपे जाईल, असा त्यांचा उद्देश होता. चोरीची घटना यशस्वी झाल्यानंतर पकडले जाऊ नये म्हणून, आरोपी गुगल मॅपवरच पळून जाण्यासाठी सोयीस्कर आणि कमी गर्दीचे रस्ते किंवा मार्ग निश्चित करायचे. अशाप्रकारे संपूर्ण नियोजन करून ते थेट सोसायटीमध्ये प्रवेश करायचे, घरफोडी करून त्वरित पसार व्हायचे. त्यांची ही कार्यपद्धती अत्यंत जलद आणि पद्धतशीर होती.

पोलिसांचा 'स्मार्ट' तपास

या 'स्मार्ट' चोरट्यांच्या कार्यपद्धतीमुळे पोलिसांपुढे एक मोठे आव्हान उभे राहिले होते. मात्र, पिंपरी-चिंचवड गुन्हे शाखा युनिट पाचच्या पोलिसांनी तातडीने तपासचक्र फिरवले. या गुन्हेगारांच्या हालचाली आणि मार्गाचा मागोवा घेण्यासाठी पोलिसांनी परिसरातील 100 ते 120 सीसीटीव्ही कॅमेऱ्यांमधील फुटेजची अक्षरशः चाळणी केली.

सततच्या तपासणीदरम्यान, पोलिसांना एका सीसीटीव्ही कॅमेऱ्यात आरोपींची संशयास्पद हालचाल दिसून आली. या माहितीच्या आधारावर, पोलिसांनी अत्यंत गुप्तपणे या दोघांना ताब्यात घेतले. गुगल मॅपचा वापर करून चोरी करण्याची ही पद्धत पोलिसांसाठी नवीन असली तरी, पोलिसांनी त्यांच्या 'स्मार्ट' तपासाने या चोरट्यांच्या मनसुब्यांवर पाणी फेरले आहे. या दोन्ही आरोपींची पुढील चौकशी सुरू आहे.