Dowry Case : पोटात 5 महिन्यांचं बाळ, सासरच्या अत्याचारामुळे महिला व्यथित; घटनेचा भयंकर शेवट

Maharashtra Dowry Case: छत्रपती संभाजीनगरहून एक थरकाप उडवणारी घटना समोर आली आहे. येथील हरसूल भागात एका गर्भवती महिलेने हुंड्याचा दबाव आणि सासरच्या मंडळींकडून केलेल्या अत्याचाराला त्रासून आत्महत्या केली. या घटनेनंतर पुन्हा एकदा हुंडाबळीसारखा महत्त्वाचा मुद्दा समोर आला आहे. समाजात हुंड्यासारखी कुप्रथा कधी बंद होणार असा सवाल उपस्थित केला जात आहे. 

महिला ५ महिन्यांची गर्भवती होती...

मृत महिलेचं नाव आयशा अरबाज शेख असल्याचं समोर आलं आहे. आयशा अवघी २३ वर्षांची होती आणि पाच महिन्यांची गर्भवती होती. तिने राहत्या घरात गळफास घेतला अन् स्वत:ला संपवलं. आई होणाऱ्या आयशाने इतकं टोकाचं पाऊल का उचललं असेल याबाबत विचार करून थरकाप उडतो. 

सुसाइड नोटमधून समोर आली वेदनादायी कहाणी...

आयशाने आत्महत्येपूर्वी एक सुसाइड नोट लिहिली आहे. या नोटमध्ये तिने तिच्यासोबत घडलेला प्रकार कथन केला. तिने लिहिलंय, तिचा पती अरबाज याला फळांचा व्यवसाय सुरू करण्याची इच्छा होती. यासाठी तो आयशावर सात लाख रुपये आणण्यासाठी दबाव आणत होता. मात्र आयशाच्या सासरच्या मंडळींकडून पैसे न आल्याने तो तिच्यासोबत गैरकृत्य करू लागला. 

नक्की वाचा - Kidney Racket : प्रेयसीवर लाखोंची उधळपट्टी, अमेरिका टूर; गर्लफ्रेंडच्या नादात हिमांशूचं आयुष्य उद्ध्वस्त

गरीबीमुळे अपरिहार्यता...

आयशाच्या वडिलांनी इतकी मोठी रक्कम देण्यास सक्षम नसल्याचं सांगितलं. त्यांनाही आर्थिक चणचण असल्याचं ते म्हणाले. मात्र पैशांच्या लालसेपोटी ते आयशाचा छळ करीत होते. तिला शारिरीकदृष्ट्या त्रास दिला जात होता. 

मारहाणीमुळे आयशा व्यथित...

सुसाइट नोटनुसार, सासरची मंडळी आयशाला दररोज मारहाण करीत होती. तिला शिव्या-शाप दिल्या जात. गर्भवती असतानाही तिच्यासोबत अमानवीय व्यवहार केला जात होता. शेवटी या त्रासाला कंटाळून आयशाने स्वत:ला संपवण्याचा निर्णय घेतला.