Dharavi Project: धारावीकरांना सुवर्णसंधी! प्रलंबित सर्वेक्षण पूर्ण करण्यासाठी DRP विशेष मोहिम राबवणार

Dharavi Redevelopment Project News: अपुरी कागदपत्रे किंवा अन्य कारणांमुळे, सर्वेक्षणाची प्रक्रिया पूर्ण न केलेल्या धारावीकरांना राज्य सरकारने पुन्हा एक संधी उपलब्ध करून दिली आहे. सर्व लाभार्थ्यांना पुनर्विकासात सामावून घेण्याच्या उद्देशाने, धारावी पुनर्विकास प्रकल्पाच्या (डीआरपी)  वतीने 'दस्तावेज संकलनासाठी' विशेष मोहिमेचे आयोजन करण्यात येणार आहे. 1 नोव्हेंबर ते 15 नोव्हेंबर दरम्यान राबविल्या जाणाऱ्या या मोहिमेत सहभागी होणाऱ्या पात्र धारावीकरांना त्यांचे आवश्यक दस्तावेज डीआरपीसमोर सादर करून सर्वेक्षणाची प्रक्रिया पूर्ण करण्याची संधी मिळणार आहे.

प्रत्येक पात्र कुटुंबाचा सहभाग सुनिश्चित करतानाच एकही लाभार्थी कुटुंब पुनर्विकासापासून वंचित राहू नये, यासाठी आयोजित करण्यात येणाऱ्या या विशेष मोहिमेचा लाभ जास्तीत जास्त रहिवाशांनी घ्यावा, असे आवाहन राज्य शासनाच्या वतीने करण्यात आले आहे. “दोन आठवड्याच्या या व्यापक मोहिमेत, अपूर्ण अथवा अंशतः पडताळणी झालेल्या प्रकरणांची नोंद पूर्ण करण्यासाठी विशेष प्रयत्न करण्यात येणार आहेत. तरीही, सर्व रहिवाशांनी स्वयंस्फूर्तीने पुढे येऊन निर्धारित दस्तावेज संकलन केंद्रांवर आवश्यक दस्तावेज जमा करावेत" असे आवाहन डीआरपीच्या वरिष्ठ अधिकाऱ्याने केले.

Dharavi Redevelopment: पुनर्विकासामुळे धारावीतील सुवर्ण उद्योगाला नवी 'झळाळी' स्थानिक सुवर्णकारांना विश्वास

दस्तावेज संकलनासाठी विशेष मोहीम

"आवश्यक कागदपत्रांची पूर्तता करून आपल्या सदनिकांचे सर्वेक्षण पूर्ण केलेल्या धारावीकरांना प्राधान्य देण्यासाठी, आम्ही परिशिष्ट 2 म्हणजेच ड्राफ्ट अनेक्स्चर- II जारी करायला सुरुवात केली आहे. ज्यांचे सर्वेक्षण अद्याप सुरू आहे किंवा नुकतेच पूर्ण झाले आहे, त्यांचा समावेश पुढील यादीत करण्यात येईल.” अशी पुस्तीही अधिकाऱ्याने जोडली. 

उपलब्ध आकडेवारीनुसार, आजवर धारावीतील 1 लाखाहून अधिक रहिवाशांनी त्यांच्या सदनिकेच्या सर्वेक्षणाची प्रक्रिया पूर्ण केली आहे. मात्र, विविध कारणांमुळे सर्वेक्षणात सहभागी न झालेल्या रहिवाशांना या प्रक्रियेत सामावून घेण्यासाठी दस्तावेज संकलन मोहिमेचे आयोजन करण्यात आले आहे. "डीआरपी/ महाराष्ट्र शासनाच्या वतीने आणि नवभारत मेगा डेव्हलपर्स प्रायव्हेट लिमिटेड (एनएमडीपीएल) च्या सहाय्याने राबविण्यात येणाऱ्या या मोहिमेत, उपजिल्हाधिकारी, तहसीलदार आणि सर्वेक्षण अधिकारी यांच्या नेतृत्वात धारावीमध्येच सेक्टरनिहाय तात्पुरत्या कार्यालयांची उभारणी करण्यात येणार आहे.

दस्तावेजांचे संकलन, पडताळणी आणि तक्रार निवारण अशा पद्धतीचे काम या कार्यालयांतून केले जाईल. घरोघरी जाणारे सर्वेक्षण अधिकारी आणि मध्यवर्ती कॉल सेंटरच्या माध्यमातून या मोहिमेचा कालावधी, आवश्यक दस्तावेज आणि अन्य माहिती रहिवाशांपर्यंत पोहोचविण्याची व्यवस्था एनएमडीपीएलकडून करण्यात येणार आहे. ही मोहीम निर्धारित केलेल्या कार्यालयांमध्ये 1 नोव्हेंबर ते 15 नोव्हेंबरपर्यंत दररोज सकाळी 10 ते सायंकाळी 6 पर्यंत राबविली जाईल." अशी माहिती डीआरपीतील वरिष्ठ अधिकाऱ्याने दिली.

'बीडीडी चाळींप्रमाणे धारावीचे स्वप्न महायुती सरकारच पूर्ण करणार', अजित पवारांंचं मोठं आश्वासन

दस्तावेज संकलन शिबिराची ठिकाणे पुढीलप्रमाणे:

शिबिर ठिकाण - १ :- शालीमार इंडस्ट्रीयल इस्टेट, टाटा पॉवर जवळ, टी.एच. कटारिया मार्ग. माटुंगा लेबर कॅम्प, मुंबई-१९

शिबिर ठिकाण - २ :- १०१/१०२,ओ विंग, कामराज स.गृ.संस्था, के. के. कृष्णन मेनन मार्ग, बालाजी नगर, धारावी, मुंबई-१७

शिबिर ठिकाण - ३ :-  एनएमडीपीएल. स्कील सेंटरच्या वर, बाबासाहेब आंबेडकर स्कूल जवळ, एम. पी. नगर, धारावी. मुंबई - १७