Prithvi Shaw: पृथ्वी शॉ सोबतची ती तरुणी कोण? सोशल मीडियावर फोटोची जोरदार चर्चा

गणेश चतुर्थीचा उत्साह सर्वत्र दिसत असताना, भारताचा युवा क्रिकेटपटू पृथ्वी शॉने सोशल मीडियावर केलेल्या एका पोस्टने सर्वांचे लक्ष वेधून घेतले आहे. सध्या भारतीय संघाबाहेर असलेला पृथ्वी शॉ याने सोशल मीडिया इन्फ्लुएन्सर आकृती अग्रवालसोबत गणेश चतुर्थी साजरी केली. शॉने गणपतीची दर्शन घेताना आकृतीसोबतचे तीन फोटो शेअर केले आहेत. या फोटोंवर चाहत्यांनी जोरदार प्रतिक्रिया दिल्या असून, अनेकांनी शॉला त्याच्या 'कमबॅक'साठी शुभेच्छा दिल्या आहेत.

पृथ्वी शॉने आपल्या इन्स्टाग्राम अकाउंटवर गणेश चतुर्थीच्या सेलिब्रेशनचे फोटो पोस्ट केले आहेत. यापैकी दोन फोटोंमध्ये तो आणि आकृती अग्रवाल गणपती बाप्पाच्या मूर्तीसोबत दिसत आहेत. या फोटोंवर "So pretty," आणि "Sending our love," अशा कमेंट्स आल्या आहेत. मात्र, अनेकांनी शॉच्या क्रिकेट करिअरबद्दलही चिंता व्यक्त केली आहे. "Bhai it's time to comeback" आणि "I am waiting for your comeback" अशा कमेंट्सचा यात समावेश आहे.

View this post on Instagram

A post shared by AKRITI AGARWAL (@akritiagarwal7)

करिअर पुन्हा रुळावर आणण्याचा प्रयत्न

काही वर्षांपूर्वी अंडर-19 वर्ल्ड कप आणि त्यानंतर कसोटी पदार्पणातच शानदार शतक ठोकून पृथ्वी शॉला भारताचा भावी स्टार मानले जात होते. मात्र, त्यानंतर खराब फॉर्म आणि फिटनेसच्या समस्येमुळे त्याला भारतीय संघातून वगळण्यात आले. गेल्या वर्षीच्या आयपीएल लिलावातही त्याला पहिल्यांदाच कोणीही खरेदी केले नाही. आपल्या करिअरला पुन्हा रुळावर आणण्यासाठी त्याने यंदा मुंबई सोडून महाराष्ट्राकडून खेळण्याचा निर्णय घेतला.

नव्या संघाकडून धमाकेदार सुरुवात

महाराष्ट्रासाठी पदार्पण करतानाच पृथ्वी शॉने आपल्या निर्णयाला योग्य ठरवले. 19 ऑगस्ट रोजी चेन्नई येथे झालेल्या बुची बाबू इनव्हिटेशनल स्पर्धेतील छत्तीसगडविरुद्धच्या सामन्यात त्याने चमकदार शतक झळकावले. 122 चेंडूंमध्ये 14 चौकार आणि 1 षटकाराच्या मदतीने त्याने हे शतक पूर्ण केले. शतक पूर्ण केल्यानंतर त्याने शांतपणे बॅट उंचावून आपल्या साथीदाराला मिठी मारली. शॉने 141 चेंडूंमध्ये 111 धावांची शानदार खेळी केली.

गेल्या वर्षी त्याला मुंबईच्या रणजी ट्रॉफी संघातून वगळण्यात आले होते आणि विजय हजारे ट्रॉफीसाठीही त्याची निवड झाली नव्हती. डिसेंबरमध्ये सय्यद मुश्ताक अली टी-20 स्पर्धेत त्याने केवळ 197 धावा केल्या होत्या. शॉ अखेर जुलै 2021 मध्ये भारतासाठी खेळला होता. आता महाराष्ट्राकडून खेळत असलेल्या शॉच्या या कामगिरीनंतर त्याचे चाहते त्याच्या मोठ्या कमबॅकची वाट पाहत आहेत.