गुरूप्रसाद दळवी, सिंधुदुर्ग
आगामी स्थानिक स्वराज्य संस्थांच्या निवडणुकीत नव्या राजकीय समीकरणाचे संकेत मिळत आहेत. आगामी नगरपरिषद आणि नगरपंचायत निवडणुकीच्या पार्श्वभूमीवर भाजपविरोधात देण्यासाठी उद्धव बाळासाहेब ठाकरे यांच्या नेतृत्वाखालील शिवसेना आणि मुख्यमंत्री एकनाथ शिंदे यांच्या नेतृत्वाखालील शिवसेना यांचे पदाधिकारी एकत्र येत असल्याचे दिसून येत आहे.
कणकवली नगरपंचायत निवडणुकीत, भाजपचे इच्छुक उमेदवार समीर नलावडे यांच्या विरोधात महाविकास आघाडी आणि शिंदेसेना हे एकत्रितपणे निवडणूक लढवण्याच्या तयारीत आहेत. यासाठी 'कणकवली शहर विकास आघाडी' या बॅनरखाली ठाकरे गट आणि शिंदे गटाच्या पदाधिकाऱ्यांची एक महत्त्वपूर्ण एकत्रित बैठक नुकतीच पार पडली आहे. सूत्रांकडून मिळालेल्या या माहितीमुळे याची राज्यभर चर्चा सुरु झाली आहे.
(नक्की वाचा- Beed News: मनोज जरांगे पाटील यांच्या हत्येचा कट; बड्या राजकीय नेत्याचं कनेक्शन उघड)
संदेश पारकरांच्या नावावर शिक्कामोर्तब?
या बैठकीमध्ये नगराध्यक्षपदासाठी ठाकरे गटाचे नेते संदेश पारकर यांच्या नावाचा प्रस्ताव पुढे आला आहे. महत्त्वाचे म्हणजे, या नावावर शिंदेसेनेने पाठिंबा दर्शवल्याचे समजते. जर हे समीकरण प्रत्यक्षात उतरले, तर राज्याच्या सर्वोच्च नेतृत्वामध्ये संघर्ष सुरू असतानाही, स्थानिक पातळीवर भाजपला टक्कर देण्यासाठी दोन्ही शिवसेना गट एकत्र येत असल्याचे स्पष्ट होईल.
भाजपचा स्वबळाचा नारा
सिंधुदुर्ग जिल्ह्यात भाजपची ताकद मोठी आहे आणि केंद्रीय मंत्री नारायण राणे यांचे मोठे राजकीय वर्चस्व आहे. नगरपरिषद आणि नगरपंचायत निवडणुकीत भाजपने स्वबळावर लढण्याचा निर्णय घेतल्यामुळे, दोन्ही शिवसेनेला भाजपविरोधी मतांचे विभाजन टाळण्यासाठी एकत्र येणे आवश्यक वाटत आहे. कणकवली हा राणे आणि शिवसेनेसाठी नेहमीच प्रतिष्ठेचा मतदारसंघ राहिला आहे.
(नक्की वाचा- Pune Land Scam: 1800 कोटींचा भूखंड घोटाळा! व्यवहार नेमका झाला कसा? खळबळजनक खुलासा)
राज्यात शिवसेना आणि भाजपची युती आहे. मात्र, कणकवलीत स्थानिक पातळीवरील राजकारण आणि भाजपचे वर्चस्व कमी करण्याच्या उद्देशाने दोन्ही शिवसेना गटांचे पदाधिकारी वैयक्तिक पातळीवर जुळवून घेण्याचा प्रयत्न करत असल्याचे चित्र आहे. या नव्या युतीमुळे कणकवली नगरपंचायतीची निवडणूक अत्यंत चुरशीची होणार हे निश्चित आहे.
