हार्ट अटॅक येण्यापूर्वीच सूचना मिळणार, लातूरमधल्या प्राध्यापकाने विकसित केले तंत्रज्ञान

सुनील कांबळे, लातूर

बदलत्या जीवनशैलीमुळे तरुणांमध्ये हृदयविकाराचं वाढतं प्रमाण चिंतेचा विषय आहे. मात्र हृदयविकाराचा झटका येणार आहे हे आधीच कळू शकतं. तसं संशोधन एका प्राध्यापकाने केलं आहे.  अस्वस्थ वाटत आहे, चक्कर येत आहे, घाम येतोय, श्वास कोंडलाय... अशी वेगवेगळी लक्षणे जाणवत असतील तर 'डिजिटल कार्डियोमीटर' द्वारे रक्ताची चाचणी केल्यानंतर रुग्णाला हृदयविकाराचा झटका येणार की नाही, हे घरबसल्या समजू शकणार आहे. त्यासाठी लातूरमधील एका प्राध्यापकाने महत्त्वपूर्ण संशोधन केले आहे. यासाठी आता केंद्र सरकारने पेटंट प्रदान केले आहे. या संशोधनाचा रुग्णांना व डॉक्टरांना मोठा आधार मिळण्याची शक्यता आहे.

लातूर येथील स्वामी रामानंद तीर्थ मराठवाडा विद्यापीठ उपकेंद्रातील तंत्रज्ञान संकुलातील डॉ. आशिष गुळवे, जैवमाहितीशास्त्र विभागात ते 2009 पासून कार्यरत आहेत. त्यांनी आरोग्य, कृषी क्षेत्राशी संबंधित विषयांवर संशोधन केले आहे. याबद्दल त्यांना डिझाइन आणि उत्पादन या वर्गातील 6 पेटंट मिळाले आहेत. यानिमित्ताने लातूरमधील विद्यापीठाच्या उपकेंद्राला प्रथमच अशा विषयांत पेटंट मिळण्याचा मान मिळाला आहे.

हृदयविकाराचा झटका येण्यापूर्वी संकेत देणारे डिजिटल कार्डियोमीटर यावर संशोधन त्यांनी केले आहे. आपण घरबसल्या उच्च रक्तदाबाच्या किंवा इतर चाचण्या करतो.  त्याच पद्धतीने ही चाचणी करू शकतो. त्यामुळे रुग्ण अत्यवस्थ आहे, त्याला हृदयविकाराचा झटका येऊ शकतो का? तो किती वेळाने येऊ शकतो? इत्याही माहिती समजू शकते. 

दुधातील भेसळ ओळखता येणार

दुधातील भेसळ वाढत आहे. त्यामुळे आजाराचे प्रमाणही वाढत आहे. म्हणून दुधातील भेसळ ओळखणारे डिजिटल अडल्ट्रेशन डिव्हाइस फॉर मिल्क हे उपकरण तयार करता येते. याद्वारे दुधात पाणी किती प्रमाणात आहे, केमिकलचा वापर किती प्रमाणात आहे, शुद्ध दुधाचे प्रमाण किती आहे, याची माहिती याद्वारे मिळू शकेल. याबद्दलच्या संशोधनाला पेटंट मिळाले आहे. 

याशिवाय, कमी वेळेत आणि कमी खर्चात शेतकऱ्यांना माती परीक्षण करण्याच्या दृष्टीने आणि पिकांमधील रोगप्रतिकारक क्षमता तसेच दृष्काळामध्ये तग धरून ठेवणारे जनुक यासंदर्भात केलेल्या संशोधनालाही पेटंट मिळाले आहे. ही पेटंट भारतीय पेटंट कार्यालयाच्या जर्नलमध्येही प्रकाशित झाली आहेत, असे डॉ. गुळवे यांनी सांगितले.